കാൻബറ: ഓസ്ട്രേലിയയിൽ അടുത്ത പൊതുതിരഞ്ഞെടുപ്പിൽ താൻ പ്രധാനമന്ത്രിയായി തിരഞ്ഞെടുക്കപ്പെടുകയാണെങ്കിൽ രാജ്യത്ത് ബുർഖ പൂർണ്ണമായും നിരോധിക്കുമെന്ന് വൺ നേഷൻ പാർട്ടി നേതാവ് പോളിൻ ഹാൻസൻ. ഒപ്പം ബീച്ചുകളിൽ ബിക്കിനി ധരിക്കാനുള്ള ഓസ്ട്രേലിയൻ സ്ത്രീകളുടെ അവകാശം സംരക്ഷിക്കുമെന്നും അവർ പ്രഖ്യാപിച്ചു. ഓസ്ട്രേലിയൻ സെനറ്റിൽ നടത്തിയ പ്രസംഗത്തിനിടയിലാണ് തന്റെ രാഷ്ട്രീയ നയങ്ങൾ വ്യക്തമാക്കി ഹാൻസൻ ഈ വിവാദ പ്രസ്താവനകൾ നടത്തിയത്.
കഴിഞ്ഞ ആഴ്ച നാഷണൽ പ്രസ് ക്ലബ്ബിൽ താൻ നടത്തിയ പ്രസംഗത്തെത്തുടർന്ന് മാധ്യമങ്ങളിൽ ഉയർന്നുവന്ന ചർച്ചകളെ ഹാൻസൻ സെനറ്റിൽ പരാമർശിച്ചു. “കഴിഞ്ഞ ആഴ്ച നാഷണൽ പ്രസ് ക്ലബ്ബിൽ ഞാൻ വലിയൊരു തെറ്റ് ചെയ്തതുപോലെയാണ് പലരും സംസാരിക്കുന്നത്. അന്ന് മുതൽ ഏകസംസ്കാരവാദത്തെ (Monoculturalism) കുറിച്ച് മാത്രമാണ് ഇവിടെ എല്ലാവരും ചർച്ച ചെയ്യുന്നത്. അത് തന്നെയാണ് ഞാൻ ഉദ്ദേശിച്ചതും,” ഹാൻസൻ വ്യക്തമാക്കി.
ഓസ്ട്രേലിയയിലെ തീവ്രവലതുപക്ഷ രാഷ്ട്രീയ പാർട്ടിയായ വൺ നേഷന്റെ തലവനാണ് പോളിൻ ഹാൻസൻ. നിലവിൽ ഓസ്ട്രേലിയൻ പാർലമെന്റിൽ ഈ പാർട്ടിക്ക് ഭരണപ്രാതിനിധ്യമില്ല. കുടിയേറ്റ വിരുദ്ധ നയങ്ങളിലൂടെയും ഇസ്ലാം വിരുദ്ധ പ്രസ്താവനകളിലൂടെയും മുൻപും നിരവധി തവണ വിവാദങ്ങളിൽ ഇടംപിടിച്ചിട്ടുള്ള നേതാവാണ് പോളിൻ ഹാൻസൻ. പുതിയ പ്രസ്താവനയും ഓസ്ട്രേലിയൻ രാഷ്ട്രീയത്തിൽ പുതിയ തർക്കങ്ങൾക്ക് വഴിതുറന്നിരിക്കുകയാണ്
