കാൻബറ: ഓസ്ട്രേലിയയിൽ മട്ടണിന്റെയും ലാംബിന്റെയും (ആട്ടിറച്ചി) വില സർവകാല റെക്കോർഡിലെത്തി. ദേശീയ മട്ടൺ വില കിലോയ്ക്ക് 900 സെന്റിന് മുകളിലെത്തിയപ്പോൾ, ചില വിപണികളിൽ ഒരു ആടിന് 392 ഓസ്ട്രേലിയൻ ഡോളർ വരെയാണ് വില ലഭിച്ചത്. മൂന്ന് വർഷം മുൻപ് വിപണിയിൽ വളരെ താഴ്ന്ന നിലയിലായിരുന്ന വിലയാണ് ഇപ്പോൾ കുത്തനെ ഉയർന്നത്.
വിപണിയിലെ ആടുകളുടെ ലഭ്യതയിലുണ്ടായ വലിയ കുറവും, നല്ല മഴയും അനുകൂല കാലാവസ്ഥയും മൂലം ആവശ്യകത വർധിച്ചതുമാണ് ഈ പെട്ടെന്നുള്ള വിലക്കയറ്റത്തിന് പ്രധാന കാരണം. വരും വർഷങ്ങളിലും രാജ്യത്തെ ആട്ടിൻകൂട്ടത്തിന്റെ എണ്ണത്തിൽ കുറവുണ്ടാകുമെന്നാണ് ഈ രംഗത്തെ വിദഗ്ദ്ധർ വിലയിരുത്തുന്നത്.
അതേസമയം, രാജ്യത്തെ കമ്പിളി വിപണിയും നിലവിൽ മികച്ച നേട്ടം കൈവരിച്ചിട്ടുണ്ട്. ഈ സീസണിൽ കമ്പിളി വില കഴിഞ്ഞ വർഷത്തേക്കാൾ 61 ശതമാനം ഉയർച്ചയാണ് രേഖപ്പെടുത്തിയത്. എന്നാൽ കനത്ത വിലവർദ്ധനവ് നിലനിൽക്കുമ്പോഴും, രാജ്യത്തിന്റെ ആകെ കമ്പിളി ഉൽപാദനം കഴിഞ്ഞ 100 വർഷത്തിനിടയിലെ ഏറ്റവും താഴ്ന്ന നിലയിലാണെന്നത് വിപണിക്ക് പുതിയ ആശങ്കകൾ സൃഷ്ടിക്കുന്നുണ്ട്.
