ന്യൂഡൽഹി: വ്യക്തിയേക്കാൾ ഉപരിയായി സംഘടനയ്ക്ക് പ്രാധാന്യം നൽകുന്ന ബിജെപിയുടെ രാഷ്ട്രീയ സംസ്കാരം വ്യക്തമാക്കുന്നതാണ് പ്രധാനമന്ത്രി നരേന്ദ്ര മോദിയുടെ പ്രസ്താവനയെന്ന് ബിജെപി ദേശീയ അധ്യക്ഷൻ നിതിൻ നവിൻ. പാർട്ടി കാര്യങ്ങളിൽ താൻ പ്രധാനമന്ത്രിയുടെ കീഴിലുള്ള ഒരു സാധാരണ പ്രവർത്തകൻ മാത്രമാണെന്നും, അദ്ദേഹം തന്റെ ബോസ് ആണെന്നും പ്രധാനമന്ത്രി നടത്തിയ പരാമർശം രാഷ്ട്രീയ കേന്ദ്രങ്ങളിൽ വലിയ ചർച്ചയായിരുന്നു.
ഇതിനെക്കുറിച്ചുള്ള ചോദ്യങ്ങൾക്ക് മറുപടിയായാണ് ക്രിക്കറ്റ് ഇതിഹാസം സച്ചിൻ തെണ്ടുൽക്കറുടെ ഉദാഹരണം ബിജെപി അധ്യക്ഷൻ ചൂണ്ടിക്കാട്ടിയത്. സച്ചിൻ തെണ്ടുൽക്കർ എത്ര വലിയ ഇതിഹാസതാരമാണെങ്കിലും, കളിക്കളത്തിൽ ഇറങ്ങുമ്പോൾ ക്യാപ്റ്റന്റെ നിർദ്ദേശങ്ങൾ അനുസരിക്കാൻ അദ്ദേഹം ബാധ്യസ്ഥനാണ്. അത് ക്രിക്കറ്റിന്റെയും കളിസംഘത്തിന്റെയും മര്യാദയാണെന്ന് അദ്ദേഹം ഓർമ്മിപ്പിച്ചു.
പ്രധാനമന്ത്രിയുടെ വാക്കുകൾ കേവലം ഒരു പ്രസ്താവനയല്ല, മറിച്ച് ബിജെപിയുടെ സംസ്കാരവും അച്ചടക്കവുമാണ് ഇതിലൂടെ വ്യക്തമാകുന്നതെന്നും നിതിൻ നവിൻ കൂട്ടിച്ചേർത്തു.
