കൊച്ചി: മലയാള സിനിമയിലെ അഭിനേതാക്കളുടെ സംഘടനയായ ‘അമ്മ’യിൽ (AMMA) ആഭ്യന്തര തർക്കങ്ങളും ചേരിപ്പോരും രൂക്ഷമാകുന്നതിനിടയിൽ പ്രമുഖ നടിമാരായ രേവതിയും പത്മപ്രിയയും സംഘടനയുടെ പ്രാഥമിക അംഗത്വം രാജിവെച്ചു. സംഘടനയ്ക്കുള്ളിൽ പുരുഷാധിപത്യവും അധികാരമോഹവും ശക്തമാണെന്നും ഇത് സംഘടനയെ അതിന്റെ യഥാർത്ഥ ലക്ഷ്യങ്ങളിൽ നിന്ന് ദുർബലപ്പെടുത്തിയെന്നും ഇരുവരും കടുത്ത ഭാഷയിൽ വിമർശിച്ചു. ഈ പടിയിറങ്ങൽ ഒരു പിന്മാറ്റമല്ല, മറിച്ച് തങ്ങളുടെ ആത്മാഭിമാനത്തിന്റെ പ്രഖ്യാപനമാണെന്ന് നടിമാർ സോഷ്യൽ മീഡിയയിൽ പങ്കുവെച്ച സംയുക്ത പ്രസ്താവനയിൽ വ്യക്തമാക്കി. നിലവിലെ താൽക്കാലിക വിവാദങ്ങളുടെ പശ്ചാത്തലത്തിലല്ല തങ്ങളുടെ രാജിയെന്നും താരങ്ങൾ കൂട്ടിച്ചേർത്തു.
ഒരു ദശാബ്ദക്കാലത്തോളം സിനിമയിലെ പല സുപ്രധാന ആവശ്യങ്ങൾക്കായി സംഘടനയ്ക്കുള്ളിൽ നിന്ന് പോരാടിയെങ്കിലും സഹപ്രവർത്തകരിൽ നിന്നും സുഹൃത്തുക്കളിൽ നിന്നും മൗനവും അകൽച്ചയുമായിരുന്നു തങ്ങൾക്ക് ലഭിച്ച മറുപടിയെന്ന് നടിമാർ ചൂണ്ടിക്കാട്ടി. ഹേമ കമ്മിറ്റി റിപ്പോർട്ട് പുറത്തുവന്ന ഘട്ടത്തിൽ സംഘടനയിലുണ്ടായ കൂട്ടരാജികൾ ഉത്തരവാദിത്തങ്ങളിൽ നിന്ന് ഒഴിഞ്ഞുമാറാനുള്ള ശ്രമങ്ങൾ മാത്രമായിരുന്നു. പൊതുശ്രദ്ധ മാറിയതോടെ പഴയ രീതികളും അധികാര ക്രമങ്ങളും സംഘടനയ്ക്കുള്ളിൽ തിരിച്ചെത്തി. ഒരു സംഘടനയുടെ നിലനിൽപ്പിന് ആധാരം ചില വ്യക്തികളല്ല, മറിച്ച് അതിന്റെ വിശ്വാസയോഗ്യതയാണെന്നും താരങ്ങൾ ഫേസ്ബുക്കിൽ കുറിച്ചു.
പ്രമുഖ നടിമാരുടെ പടിയിറങ്ങലിനൊപ്പം സാമ്പത്തിക ക്രമക്കേടുകളെക്കുറിച്ചുള്ള ആരോപണങ്ങളിലേക്കും രാഷ്ട്രീയ പോരിലേക്കും സംഘടനയിലെ മറ്റ് അംഗങ്ങളും കടന്നിട്ടുണ്ട്. സംഘടനയ്ക്കുള്ളിൽ സാമ്പത്തിക ക്രമക്കേടുകൾ കണ്ടെത്തിയതോടെയാണ് തനിക്കെതിരെ അപമാനിക്കാനുള്ള ശ്രമങ്ങൾ തുടങ്ങിയതെന്ന് നടി ശ്വേത മേനോൻ ആരോപിച്ചു. വിഷയത്തിൽ കൂടുതൽ തെളിവുകൾ പുറത്തുവിടാൻ സാധ്യതയുണ്ടെന്നും ശ്വേത വ്യക്തമാക്കിയിട്ടുണ്ട്. അതേസമയം, നടി അൻസിബ നൽകിയ പരാതിയുടെ അടിസ്ഥാനത്തിൽ ‘അമ്മ’ മുൻ വൈസ് പ്രസിഡന്റ് ലക്ഷ്മി പ്രിയക്കെതിരെ പോലീസ് ഉടൻ കേസെടുത്തേക്കുമെന്നും റിപ്പോർട്ടുകളുണ്ട്. മുൻനിര താരങ്ങളുടെ രാജിയും ഗുരുതരമായ സാമ്പത്തിക-നിയമ പ്രതിസന്ധികളും ‘അമ്മ’ സംഘടനയെ വീണ്ടും കടുത്ത പ്രതിസന്ധിയിലേക്കാണ് തള്ളിവിട്ടിരിക്കുന്നത്.
