മെൽബൺ: ഓസ്ട്രേലിയയിലെ മലയാളി സമൂഹത്തിന് വേറിട്ടൊരു സാംസ്കാരികാനുഭവം സമ്മാനിച്ചുകൊണ്ട് വിപഞ്ചിക ഗ്രന്ഥശാല മെൽബൺ ചാപ്റ്ററിന്റെ പത്താം വാർഷികാഘോഷം ‘ദശകം 2026’ ബോക്സ് ഹിൽ ടൗൺ ഹാളിൽ വൻ ജനപങ്കാളിത്തത്തോടെ വിജയകരമായി സമാപിച്ചു. വടക്കൻ കേരളത്തിന്റെ തനിമയും പാരമ്പര്യവും ഓസ്ട്രേലിയൻ മണ്ണിൽ ജീവസ്സുറ്റതാക്കി മാറ്റിയ ഈ സാംസ്കാരിക സായാഹ്നം പങ്കെടുത്ത ഏവർക്കും മറക്കാനാകാത്ത ഒരു അനുഭവമായി മാറി.
ഓസ്ട്രേലിയയുടെ വിവിധ സംസ്ഥാനങ്ങളിൽ നിന്നും യാത്രചെയ്തെത്തിയ നൂറുകണക്കിന് പ്രേക്ഷകർക്ക് മുന്നിലാണ് കേരളത്തിന്റെ തനത് കലാരൂപങ്ങളും നാടകങ്ങളും അരങ്ങേറിയത്. ചരിത്രത്തിലാദ്യമായി ഓസ്ട്രേലിയൻ മണ്ണിൽ മലബാറിന്റെ ആത്മീയ-സാംസ്കാരിക പ്രതീകമായ ‘ശ്രീ പരശ്ശിനിക്കടവ് മുത്തപ്പൻ വെള്ളാട്ടം’ അവർക്കായി വേദിയിലെത്തിച്ചു. കൂടാതെ കരിക്കുലം നാടകം, കപികുലം, പുലിജന്മം തുടങ്ങിയ നാടകങ്ങളും മറ്റ് വൈവിധ്യമാർന്ന സാംസ്കാരിക പരിപാടികളും കാണികൾക്ക് ഹൃദ്യമായ ദൃശ്യവിരുന്നൊരുക്കി.
കപിക്കുലം നാടകത്തിലൂടെ പ്രേക്ഷകരെ വിസ്മയിപ്പിച്ച പ്രശസ്ത താരം ഉണ്ണി രാജ, ബിജു ഇരിണാവ്, തെയ്യം കലാകാരൻ ഹരിദാസ് പണിക്കർ എന്നിവരുടെ ശ്രദ്ധേയമായ പ്രകടനങ്ങൾ പരിപാടിയുടെ മാറ്റ് കൂട്ടി. ഇവരുടെ ആത്മസമർപ്പണത്തോടെയുള്ള പ്രകടനങ്ങൾക്ക് സംഘാടകർ ഹൃദയപൂർവ്വം നന്ദി രേഖപ്പെടുത്തി.
പരിപാടിയുടെ വൻ വിജയത്തിന് പിന്നിൽ പ്രവർത്തിച്ച വോളന്റിയർമാർ, സംഘാടകർ, സ്പോൺസർമാർ, സാങ്കേതിക പ്രവർത്തകർ, കലാകാരന്മാർ, ഭക്ഷണവും മറ്റ് ക്രമീകരണങ്ങളും കൈകാര്യം ചെയ്തവർ തുടങ്ങി എല്ലാവരോടും വിപഞ്ചിക ഗ്രന്ഥശാലയ്ക്കുള്ള പ്രത്യേക കടപ്പാടും ഹൃദയം നിറഞ്ഞ നന്ദിയും അറിയിക്കുന്നതായി ഭാരവാഹികൾ വാർത്താക്കുറിപ്പിൽ അറിയിച്ചു. തലമുറകളെ തമ്മിൽ ബന്ധിപ്പിച്ചും തനത് സംസ്കാരത്തെ വരുംതലമുറയ്ക്കായി നെഞ്ചിലേറ്റിയും കടന്നുപോയ ‘ദശകം 2026’ വരും വർഷങ്ങളിൽ കൂടുതൽ മനോഹരമായ ആഘോഷങ്ങളുമായി വീണ്ടും കാണാമെന്ന പ്രതീക്ഷയോടെയാണ് സമാപിച്ചത്.
