സ്കോപ്യേ: ഇന്ത്യൻ രാഷ്ട്രപതി ദ്രൗപദി മുർമുവിന്റെ ചരിത്രപ്രസിദ്ധമായ നോർത്ത് മാസിഡോണിയൻ സന്ദർശനത്തിന് തുടക്കമായി. തലസ്ഥാനമായ സ്കോപ്യേയിലെ ഔദ്യോഗിക വസതിയായ ‘വില്ല വോഡ്നോ’യിൽ എത്തിയ രാഷ്ട്രപതിയെ നോർത്ത് മാസിഡോണിയൻ പ്രസിഡന്റ് ഗോർദാന സിൽജാനോവ്സ്ക-ദാവ്കോവ ഊഷ്മളമായി സ്വീകരിച്ചു. രാഷ്ട്രപതിക്ക് അവിടെ ആചാരപരമായ സൈനിക സല്യൂട്ടും ഗാർഡ് ഓഫ് ഓണറും നൽകി ആദരിച്ചു.
ഇന്ത്യൻ രാഷ്ട്രപതിയുടെ ആദ്യ നോർത്ത് മാസിഡോണിയൻ സന്ദർശനമാണിത്. തുടർന്ന് ഇരു നേതാക്കളും തമ്മിൽ ഉഭയകക്ഷി സഹകരണത്തിന്റെ വിവിധ മേഖലകളെക്കുറിച്ചും പരസ്പര താല്പര്യമുള്ള പ്രാദേശിക, ആഗോള വിഷയങ്ങളെക്കുറിച്ചും സമഗ്രമായ ചർച്ചകൾ നടത്തി. പങ്കുവെക്കപ്പെട്ട ജനാധിപത്യ മൂല്യങ്ങളിലും പരസ്പര ബഹുമാനത്തിലും അധിഷ്ഠിതമായ ഇരു രാജ്യങ്ങളും തമ്മിലുള്ള ശക്തമായ സൗഹൃദബന്ധം കൂടുതൽ ദൃഢമാക്കാൻ ചർച്ചയിൽ ധാരണയായി.
