വാഷിങ്ടൺ:ഇറാനിലെ സാഗ്രോസ് മലനിരകളിലുള്ളതായി കരുതുന്ന ഭൂഗർഭ ആണവകേന്ദ്രം അമേരിക്ക ആക്രമിക്കുമെന്ന് യു.എസ്. പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. ഇറാൻ രഹസ്യമായി ആണവായുധ പദ്ധതികൾ മുന്നോട്ടുകൊണ്ടുപോകുന്നുവെന്ന ആരോപണത്തിന്റെ പശ്ചാത്തലത്തിലാണ് ട്രംപിന്റെ പ്രസ്താവന.
നത്താൻസ് ആണവകേന്ദ്രത്തിന് സമീപമുള്ള ‘പിക്കാക്സ് മൗണ്ടൻ’ (Pickaxe Mountain) എന്നറിയപ്പെടുന്ന ഭൂഗർഭ സമുച്ചയത്തിലാണ് ആണവസാമഗ്രികളും അത്യാധുനിക സെൻട്രിഫ്യൂജുകളും സൂക്ഷിച്ചിരിക്കുന്നതെന്നാണ് ഇസ്രയേൽ ഉൾപ്പെടെയുള്ള ചില രഹസ്യാന്വേഷണ വിലയിരുത്തലുകൾ. എന്നാൽ ഈ കേന്ദ്രത്തിന്റെ യഥാർഥ പ്രവർത്തനത്തെക്കുറിച്ച് സ്വതന്ത്ര സ്ഥിരീകരണം ലഭ്യമായിട്ടില്ല.
ആവശ്യമായാൽ ഈ കേന്ദ്രത്തിനെതിരെ സൈനിക നടപടി സ്വീകരിക്കുമെന്ന് ട്രംപ് വ്യക്തമാക്കിയതോടെ മേഖലയിൽ വീണ്ടും സംഘർഷഭീതി ശക്തമായിരിക്കുകയാണ്. ആക്രമണമുണ്ടായാൽ ശക്തമായി തിരിച്ചടിക്കുമെന്ന് ഇറാൻ മുന്നറിയിപ്പ് നൽകിയിട്ടുണ്ട്.
