കൊച്ചി:ന്യൂഡൽഹിയിൽ നടന്ന വിദ്യാർഥി പ്രതിഷേധത്തിന് പിന്തുണ അറിയിച്ച നടൻ മോഹൻലാലിന്റെ മകൾ വിസ്മയ മോഹൻലാൽ സമൂഹമാധ്യമങ്ങളിൽ വിമർശനങ്ങൾ നേരിടുന്നു. ഡൽഹിയിലെ സമരവുമായി ബന്ധപ്പെട്ട് പൊലീസ് നടപടിയെ വിമർശിക്കുന്ന ഒരു ഇൻസ്റ്റഗ്രാം സ്റ്റോറി പങ്കുവെച്ചതോടെയാണ് വിവാദം ശക്തമായത്.
വിദ്യാർഥികൾക്കെതിരായ കണ്ണീർവാതക പ്രയോഗം, ലാത്തിച്ചാർജ്, റോഡ് തടയൽ, മെട്രോ സ്റ്റേഷനുകൾ അടച്ചിടൽ, കനത്ത ബാരിക്കേഡുകൾ, ഇന്റർനെറ്റ് നിയന്ത്രണം എന്നിവ ചൂണ്ടിക്കാട്ടിയ കുറിപ്പാണ് വിസ്മയ പങ്കുവെച്ചത്. പ്രതിഷേധക്കാരുടെ ആവശ്യങ്ങളോട് യോജിക്കണമെന്നില്ലെങ്കിലും സമാധാനപരമായി പ്രതിഷേധിക്കുന്ന പൗരന്മാരെ അമിതബലം പ്രയോഗിച്ച് നേരിടുന്നതിനെക്കുറിച്ച് സമൂഹം ചോദ്യങ്ങൾ ഉയർത്തണമെന്ന് ആ കുറിപ്പിൽ പറയുന്നു.
പോസ്റ്റ് പുറത്തുവന്നതിന് പിന്നാലെ വിസ്മയയുടെ സമൂഹമാധ്യമ അക്കൗണ്ടുകളിൽ വ്യാപക വിമർശനങ്ങളും അധിക്ഷേപപരമായ പ്രതികരണങ്ങളും ഉയർന്നു. രാഷ്ട്രീയ വിഷയത്തിൽ നിലപാട് സ്വീകരിച്ചതിനെയും, ആദ്യ സിനിമയുടെ റിലീസിന് മുമ്പ് ഇത്തരമൊരു പ്രതികരണം നടത്തിയതിനെയും ചിലർ വിമർശിച്ചു. അതേസമയം, അഭിപ്രായസ്വാതന്ത്ര്യത്തിനും സമാധാനപരമായ പ്രതിഷേധത്തിനുമുള്ള പിന്തുണ പ്രകടിപ്പിച്ചതാണെന്ന നിലപാടും നിരവധി പേർ പങ്കുവെച്ചു.
