ന്യൂഡൽഹി: നീറ്റ് ചോദ്യപേപ്പർ ചോർച്ചയും വിദ്യാർഥി പ്രതിഷേധങ്ങളും സംബന്ധിച്ച വിഷയത്തിൽ പാർലമെന്റിൽ ചർച്ച നടത്തണമെങ്കിൽ കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ ആദ്യം രാജിവയ്ക്കണമെന്ന് കോൺഗ്രസ് അധ്യക്ഷനും രാജ്യസഭയിലെ പ്രതിപക്ഷ നേതാവുമായ മല്ലികാർജുൻ ഖാർഗെ ആവശ്യപ്പെട്ടു. രാജിയില്ലാതെ ചർച്ചയിൽ പങ്കെടുക്കില്ലെന്ന നിലപാടാണ് പ്രതിപക്ഷം സ്വീകരിച്ചിരിക്കുന്നത്.
ചർച്ചയ്ക്ക് യാതൊരു ഉപാധികളുമില്ലാതെ തയ്യാറാണെന്ന് കേന്ദ്രസർക്കാർ അറിയിച്ചതിന് പിന്നാലെയാണ് ഖാർഗെ രാജ്യസഭയിൽ പ്രതിപക്ഷത്തിന്റെ നിബന്ധനകൾ പ്രഖ്യാപിച്ചത്. വിദ്യാഭ്യാസമന്ത്രി രാജിവയ്ക്കുകയും നീറ്റ് ക്രമക്കേടും വിദ്യാർഥികൾക്കെതിരായ നടപടികളും സംബന്ധിച്ച വിഷയം രാജ്യസഭാ ചട്ടം 267 പ്രകാരം മറ്റ് നടപടികൾ നിർത്തിവെച്ച് അടിയന്തര ചർച്ചയ്ക്ക് അനുവദിക്കണമെന്നും അദ്ദേഹം ആവശ്യപ്പെട്ടു.
“വിദ്യാഭ്യാസമന്ത്രി ആദ്യം രാജിവയ്ക്കണം. അതിനുശേഷം ചട്ടം 267 പ്രകാരം ചർച്ച നടത്തണം. വിദ്യാർഥികളെ മർദിക്കുകയാണ് സർക്കാർ ചെയ്യുന്നത്,” എന്ന് ഖാർഗെ സഭയിൽ പറഞ്ഞു. പ്രതിപക്ഷ നേതാക്കൾ അദ്ദേഹത്തിന്റെ ആവശ്യത്തിന് പിന്തുണ പ്രഖ്യാപിക്കുകയും വിദ്യാഭ്യാസമന്ത്രി രാജിവയ്ക്കണമെന്ന ആവശ്യം ആവർത്തിക്കുകയും ചെയ്തു.
