ബെയ്ജിങ്: ആണവസംയോജന (ന്യൂക്ലിയർ ഫ്യൂഷൻ) സാങ്കേതികവിദ്യയിൽ നിർണായക മുന്നേറ്റവുമായി ചൈന. ‘കൃത്രിമ സൂര്യൻ’ (EAST) പദ്ധതിക്കായി ആവശ്യമായ രണ്ട് പ്രധാന സൂപ്പർകണ്ടക്ടിങ് കാന്തങ്ങൾ പൂർണമായും തദ്ദേശീയ സാങ്കേതികവിദ്യ ഉപയോഗിച്ച് വികസിപ്പിച്ചതായി ചൈനീസ് ഗവേഷകർ അറിയിച്ചു. ഫ്യൂഷൻ റിയാക്ടറിന്റെ നിർമാണത്തിൽ ഇത് പ്രധാന നാഴികക്കല്ലായാണ് വിലയിരുത്തപ്പെടുന്നത്.
ഇതിൽ ഡി-ആകൃതിയിലുള്ള ടോറോയിഡൽ ഫീൽഡ് (TF) സൂപ്പർകണ്ടക്ടിങ് കാന്തത്തിന് 21 മീറ്റർ നീളവും 12 മീറ്റർ വീതിയും 3.3 മീറ്റർ ഉയരവും 582 ടൺ ഭാരവുമുണ്ട്. ഫ്യൂഷൻ റിയാക്ടറിനായി ഇതുവരെ നിർമിച്ചതിൽ ഏറ്റവും വലിയ സൂപ്പർകണ്ടക്ടിങ് കാന്തമാണിതെന്ന് ചൈന അവകാശപ്പെടുന്നു. അത്യുഷ്ണ പ്ലാസ്മയെ നിയന്ത്രിച്ച് സ്ഥിരതയോടെ നിലനിർത്തുന്നതിൽ ഈ കാന്തങ്ങൾക്ക് നിർണായക പങ്കുണ്ട്.
2025-ൽ EAST റിയാക്ടർ 1,066 സെക്കൻഡ് വരെ ഉയർന്ന താപനിലയിലുള്ള പ്ലാസ്മ സ്ഥിരമായി നിലനിർത്തി ലോക റെക്കോർഡ് സ്ഥാപിച്ചിരുന്നു. പുതിയ കാന്തസാങ്കേതികവിദ്യയുടെ സഹായത്തോടെ 2027-ഓടെ പരീക്ഷണ റിയാക്ടർ പൂർത്തിയാക്കി 2030-ഓടെ ഫ്യൂഷൻ വൈദ്യുതി ഉൽപ്പാദനം പ്രദർശിപ്പിക്കുകയാണ് ചൈനയുടെ ലക്ഷ്യം.
