തിരുവനന്തപുരം:പിഎം ശ്രീ പദ്ധതി സംബന്ധിച്ച വിഷയത്തിൽ യുഡിഎഫ് കൺവീനർ അടൂർ പ്രകാശിന്റെ പ്രതികരണം തള്ളി മുസ്ലിം ലീഗ് ദേശീയ ജനറൽ സെക്രട്ടറിയും മന്ത്രിയുമായ പി.കെ. കുഞ്ഞാലിക്കുട്ടി രംഗത്തെത്തി. യുഡിഎഫ് യോഗത്തിൽ പിഎം ശ്രീ പദ്ധതിയെക്കുറിച്ച് യാതൊരു ചർച്ചയും നടന്നിട്ടില്ലെന്നും, ഇത്തരത്തിൽ പ്രചരിക്കുന്ന വാർത്തകൾ അടിസ്ഥാനരഹിതമാണെന്നും അദ്ദേഹം പറഞ്ഞു.
മന്ത്രിസഭ നിയോഗിച്ച ഉപസമിതിയുടെ റിപ്പോർട്ടിന്റെ അടിസ്ഥാനത്തിലായിരിക്കും പദ്ധതിയെക്കുറിച്ചുള്ള തുടർനടപടികൾ തീരുമാനിക്കുകയെന്ന് കുഞ്ഞാലിക്കുട്ടി വ്യക്തമാക്കി. കേന്ദ്രത്തിന്റെ പാഠ്യപദ്ധതിയിലോ സ്കൂളുകളുടെ തിരഞ്ഞെടുപ്പിലോ നിബന്ധനകൾ കേരളം അംഗീകരിക്കില്ലെന്നും അദ്ദേഹം ആവർത്തിച്ചു.
അതേസമയം, മുൻദിവസം അടൂർ പ്രകാശ് നടത്തിയ വാർത്താസമ്മേളനത്തിൽ, മുൻ എൽഡിഎഫ് സർക്കാർ കേന്ദ്രവുമായി ധാരണാപത്രം ഒപ്പുവെച്ചതിനാൽ സംസ്ഥാനത്തിന് പദ്ധതിയിൽ നിന്ന് പിന്മാറാനാകില്ലെന്നും, സ്കൂളുകളുടെ തിരഞ്ഞെടുപ്പ് ഉൾപ്പെടെയുള്ള കാര്യങ്ങളിൽ സംസ്ഥാനത്തിനായിരിക്കും തീരുമാനാധികാരമെന്നുമാണ് പറഞ്ഞിരുന്നത്.
കുഞ്ഞാലിക്കുട്ടിയുടെ പ്രതികരണത്തിന് പിന്നാലെ അടൂർ പ്രകാശ് നിലപാട് വിശദീകരിച്ചു. പിഎം ശ്രീ പദ്ധതി സംബന്ധിച്ച് യുഡിഎഫ് യോഗത്തിൽ പ്രത്യേക ചർച്ച നടന്നിട്ടില്ലെന്നും, അന്തിമ തീരുമാനം മന്ത്രിസഭാ ഉപസമിതിയുടെ റിപ്പോർട്ടിന്റെ അടിസ്ഥാനത്തിലായിരിക്കുമെന്നും അദ്ദേഹം പിന്നീട് വ്യക്തമാക്കി.
