പത്തനംതിട്ട :പത്തനംതിട്ട ജില്ലയിലെ ജലസംഭരണികളുടെ വൃഷ്ടിപ്രദേശങ്ങളിൽ ശക്തമായ മഴ തുടരുന്നതിനാൽ ജില്ലയിലെ പ്രധാന ഡാമുകളിൽ നിന്ന് നിയന്ത്രിതമായി വെള്ളം ഒഴുക്കിവിടാൻ തീരുമാനിച്ചു. ജലനിരപ്പ് ഉയർന്ന സാഹചര്യത്തിലാണ് ഡാമുകളുടെ ഷട്ടറുകൾ തുറക്കുന്നതെന്ന് അധികൃതർ അറിയിച്ചു.
ഡാമുകളുടെ താഴ്വാരങ്ങളിലും പമ്പ, കക്കാട്ടാർ തുടങ്ങിയ നദീതീര പ്രദേശങ്ങളിലുമുള്ളവർ അതീവ ജാഗ്രത പാലിക്കണമെന്ന് ജില്ലാ ഭരണകൂടം നിർദേശിച്ചു. നദികളിലും കൈവഴികളിലും ഇറങ്ങുന്നത് ഒഴിവാക്കണമെന്നും മത്സ്യബന്ധനം, കുളിക്കൽ, അലക്കൽ തുടങ്ങിയ പ്രവർത്തനങ്ങൾ താത്കാലികമായി നിർത്തിവയ്ക്കണമെന്നും മുന്നറിയിപ്പുണ്ട്.
പ്രാദേശിക ഭരണസ്ഥാപനങ്ങൾ, ദുരന്തനിവാരണ വിഭാഗം, പൊലീസ്, ഫയർഫോഴ്സ് എന്നിവരെ അടിയന്തര സാഹചര്യം നേരിടാൻ സജ്ജമാക്കിയിട്ടുണ്ട്. താഴ്ന്ന പ്രദേശങ്ങളിൽ താമസിക്കുന്നവർ അധികൃതരുടെ നിർദേശങ്ങൾ കർശനമായി പാലിക്കണമെന്നും ആവശ്യമായാൽ സുരക്ഷിത കേന്ദ്രങ്ങളിലേക്ക് മാറാൻ തയ്യാറാകണമെന്നും അധികൃതർ അറിയിച്ചു.
സംസ്ഥാനത്ത് ശക്തമായ മഴ തുടരാൻ സാധ്യതയുള്ളതിനാൽ പൊതുജനങ്ങൾ ഔദ്യോഗിക മുന്നറിയിപ്പുകൾ നിരന്തരം ശ്രദ്ധിക്കുകയും അഭ്യൂഹങ്ങൾ പ്രചരിപ്പിക്കാതിരിക്കുകയും ചെയ്യണമെന്ന് ദുരന്തനിവാരണ അധികൃതർ അഭ്യർഥിച്ചു.
