മുംബൈ: അന്തരിച്ച നടൻ പ്രദീപ് റാവത്തിന് ചലച്ചിത്രലോകം അന്ത്യാഞ്ജലി അർപ്പിച്ചു. മുംബൈയിൽ നടന്ന സംസ്കാരച്ചടങ്ങിൽ നടൻ ആമിർ ഖാൻ, സംവിധായകൻ അശോക് പണ്ഡിറ്റ്, നടൻ അഖിലേന്ദ്ര മിശ്ര, രാജ് അർജുൻ, കരൺ വി. ഗ്രോവർ, സുരേന്ദ്ര പാൽ തുടങ്ങിയവർ പങ്കെടുത്ത് ആദരാഞ്ജലി അർപ്പിച്ചു.
‘ലഗാൻ’, ‘ഗജിനി’ ഉൾപ്പെടെയുള്ള ചിത്രങ്ങളിലെ വില്ലൻ കഥാപാത്രങ്ങളിലൂടെ ശ്രദ്ധേയനായ പ്രദീപ് റാവത്ത് ഓഗസ്റ്റ് 4-ന് 74-ാം വയസ്സിൽ അർബുദബാധയെ തുടർന്ന് അന്തരിച്ചു. നാല് പതിറ്റാണ്ടിലേറെ നീണ്ട അഭിനയജീവിതത്തിൽ ഹിന്ദി, തെലുങ്ക്, തമിഴ്, മലയാളം ഉൾപ്പെടെ വിവിധ ഭാഷകളിലെ സിനിമകളിൽ അദ്ദേഹം ശ്രദ്ധേയ വേഷങ്ങൾ അവതരിപ്പിച്ചിരുന്നു.
പ്രദീപ് റാവത്തിന്റെ വിയോഗത്തിൽ അനുശോചനം രേഖപ്പെടുത്തി ആമിർ ഖാൻ, സൽമാൻ ഖാൻ, പവൻ കല്യാൺ, പ്രഭുദേവ, വിഷ്ണു മഞ്ചു തുടങ്ങിയ സിനിമാതാരങ്ങളും സാമൂഹിക മാധ്യമങ്ങളിലൂടെ ശ്രദ്ധാഞ്ജലി അർപ്പിച്ചു. ‘ഗജിനി’യിലെ അദ്ദേഹത്തിന്റെ പ്രകടനം ഇന്ത്യൻ സിനിമയിലെ ഏറ്റവും ശക്തമായ വില്ലൻ കഥാപാത്രങ്ങളിലൊന്നായിരുന്നുവെന്നും ആ കഥാപാത്രമില്ലാതെ ചിത്രം ഇത്ര വിജയകരമാകുമായിരുന്നില്ലെന്നും ആമിർ ഖാൻ അനുസ്മരിച്ചു.
