ന്യൂഡൽഹി: ഫുക്കറ്റിൽനിന്ന് ഡൽഹിയിലേക്ക് വന്ന എയർ ഇന്ത്യ വിമാനത്തിലെ പൈലറ്റിന് പോസ്റ്റ്-ഫ്ലൈറ്റ് ഡ്രഗ് ടെസ്റ്റിൽ പോസിറ്റീവ് ഫലം ലഭിച്ചതായി റിപ്പോർട്ടുകൾ. ഓഗസ്റ്റ് നാലിന് AI2379 വിമാനമാണ് ശക്തമായ പ്രക്ഷുബ്ധതയിൽപ്പെട്ടത്. സംഭവത്തിൽ യാത്രക്കാർക്കും ജീവനക്കാർക്കും പരിക്കേറ്റിരുന്നു.
വിമാനം യാത്രയ്ക്കിടെ പെട്ടെന്ന് ഏകദേശം 300 അടി താഴേക്ക് പതിച്ചതിനെ തുടർന്നാണ് പരിശോധന നടത്തിയത്. സംഭവത്തിൽ 17 പേർക്ക് പരിക്കേറ്റതായി റിപ്പോർട്ടുകളുണ്ട്. സംഭവത്തിൽ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) അന്വേഷണം നടത്തിവരികയാണ്.
എന്നാൽ പൈലറ്റിന്റെ ഡ്രഗ് ടെസ്റ്റ് പരാജയപ്പെട്ടുവെന്ന റിപ്പോർട്ട് എയർ ഇന്ത്യ സ്ഥിരീകരിച്ചിട്ടില്ല. പോസ്റ്റ്-ഫ്ലൈറ്റ് പരിശോധന നടത്തിയിട്ടുണ്ടെന്നും അതിന്റെ ഫലം ഇതുവരെ തങ്ങൾക്ക് ലഭിച്ചിട്ടില്ലെന്നും എയർ ഇന്ത്യ വ്യക്തമാക്കി. അതിനാൽ പൈലറ്റ് മയക്കുമരുന്ന് ഉപയോഗിച്ചിരുന്നതായി ഇപ്പോൾ സ്ഥിരീകരിച്ച് പറയാനാകില്ല.
സംഭവത്തിന്റെ കാരണം, വിമാനത്തിന്റെ സുരക്ഷാ നടപടികൾ, പൈലറ്റുമാരുടെ പരിശോധനാഫലം എന്നിവ സംബന്ധിച്ച് DGCAയുടെ വിശദമായ പരിശോധന തുടരുകയാണ്.
