വാഷിങ്ടൺ: ഇറാനെ സാമ്പത്തികമായി സഹായിക്കുന്ന രാജ്യങ്ങൾക്കെതിരെ കടുത്ത നടപടിയുണ്ടാകുമെന്ന് യുഎസ് പ്രസിഡന്റ് ഡോണൾഡ് ട്രംപ് മുന്നറിയിപ്പ് നൽകി. ഇറാനെ സാമ്പത്തികമായി ഒറ്റപ്പെടുത്തുന്നതിനുള്ള നടപടികൾ ശക്തമാക്കുമെന്നും ട്രംപ് വ്യക്തമാക്കി.
ഇറാനിലെ ധനകാര്യ സ്ഥാപനങ്ങൾ, വ്യാപാര സ്ഥാപനങ്ങൾ, വിമാനത്താവളങ്ങൾ, സർക്കാർ സ്ഥാപനങ്ങൾ തുടങ്ങിയവയ്ക്ക് ഏതെങ്കിലും തരത്തിൽ സഹായം നൽകുന്ന രാജ്യങ്ങൾ ഗുരുതരമായ സാമ്പത്തിക പ്രത്യാഘാതങ്ങൾ നേരിടേണ്ടിവരുമെന്നാണ് ട്രംപിന്റെ മുന്നറിയിപ്പ്. എണ്ണക്കടത്ത്, സാമ്പത്തിക ഇടപാടുകൾ, കള്ളപ്പണ കൈമാറ്റം, കപ്പൽ രജിസ്ട്രേഷൻ, മുന്നണിക്കമ്പനികൾ തുടങ്ങിയ വഴികളിലൂടെയുള്ള ഇറാന്റെ സാമ്പത്തിക ബന്ധങ്ങൾ തടയുകയാണ് ലക്ഷ്യമെന്നും അദ്ദേഹം സൂചിപ്പിച്ചു.
എന്നാൽ രാജ്യങ്ങൾക്കെതിരെ സ്വീകരിക്കാനിരിക്കുന്ന പ്രത്യേക നടപടികൾ ട്രംപ് വ്യക്തമാക്കിയിട്ടില്ല. ഇറാനെതിരായ സാമ്പത്തിക സമ്മർദം കൂടുതൽ ശക്തമാക്കുന്നതിന്റെ ഭാഗമായി പുതിയ ഉപരോധ നടപടികൾ പ്രഖ്യാപിക്കുമെന്ന് യുഎസ് ട്രഷറി സെക്രട്ടറി സ്കോട്ട് ബെസന്റ് അറിയിച്ചിട്ടുണ്ട്.
ട്രംപിന്റെ പ്രഖ്യാപനത്തെ ഇറാൻ വിമർശിച്ചു. അമേരിക്കയിലെ സാമ്പത്തിക പ്രശ്നങ്ങളിൽനിന്ന് ജനശ്രദ്ധ തിരിക്കാനാണ് ട്രംപിന്റെ നീക്കമെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി ആരോപിച്ചു. ഉപരോധവും സമ്മർദവും പ്രശ്നങ്ങൾ പരിഹരിക്കില്ലെന്നും ചർച്ചകൾക്കാണ് മുൻഗണന നൽകേണ്ടതെന്നും ചൈന പ്രതികരിച്ചു.
