കാഠ്മണ്ഡു: നേപ്പാൾ–ചൈന അതിർത്തിയിൽ വൻ ഹിമാനി തകർന്നുണ്ടായ മഞ്ഞ്–പാറ ഇടിച്ചിലിന്റെ ദൃശ്യങ്ങൾ സഞ്ചാരി പകർത്തി. ഏകദേശം ആറ് ലക്ഷം ചതുരശ്ര മീറ്റർ വിസ്തൃതിയിലുള്ള പ്രദേശത്തെ മഞ്ഞും പാറകളും താഴേക്ക് പതിച്ചതായാണ് റിപ്പോർട്ട്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുകയാണ്.
ആഗസ്റ്റ് 26-ന് ലാങ്ടാങ് ലിരുങ് മേഖലയ്ക്ക് സമീപമുണ്ടായ ഹിമാനി തകർച്ചയാണ് വൻ മഞ്ഞ്–പാറ ഇടിച്ചിലിനും തുടർന്ന് ശക്തമായ മണ്ണും വെള്ളവും കലർന്ന ഒഴുക്കിനും കാരണമായത്. മണിക്കൂറിൽ ഏകദേശം 50 മീറ്റർ വേഗത്തിൽ നീങ്ങിയ അവശിഷ്ടപ്രവാഹം 20 കിലോമീറ്ററിലധികം ദൂരം വ്യാപിച്ചതായി Reuters റിപ്പോർട്ട് ചെയ്യുന്നു.
ചൈനയുടെ ടിബറ്റ് മേഖലയിലെ ഗ്യിറോങ് തുറമുഖം ഉൾപ്പെടെയുള്ള പ്രദേശങ്ങൾ ദുരന്തത്തിൽ തകർന്നു. നേപ്പാളിലെ റാസുവ ജില്ലയിലും വ്യാപക നാശനഷ്ടമുണ്ടായി. വീടുകൾക്കും റോഡുകൾക്കും പാലങ്ങൾക്കും പുറമെ വൈദ്യുതി പദ്ധതികൾക്കും കേടുപാടുകൾ സംഭവിച്ചു.
ഹിമാനി തകർച്ചയ്ക്ക് പിന്നാലെ രൂപപ്പെട്ട ജലാശയങ്ങൾ കൂടുതൽ പ്രളയത്തിന് കാരണമാകുമെന്ന ആശങ്കയുണ്ടായിരുന്നെങ്കിലും അതിർത്തിക്ക് സമീപമുള്ള ഒരു തടാകത്തിലെ ജലനിരപ്പ് കുറയുന്നതായി ചൈനീസ് അധികൃതർ അറിയിച്ചു. അതേസമയം മറ്റൊരു വലിയ ജലാശയം നിരീക്ഷിച്ചുവരികയാണ്.
രക്ഷാപ്രവർത്തനം തുടരുന്നതിനിടെ ദുരന്തത്തിന്റെ വ്യാപ്തി വിലയിരുത്താനുള്ള ശ്രമങ്ങളും പുരോഗമിക്കുകയാണ്. അപകടകരമായ ഭൂപ്രദേശവും തകർന്ന റോഡുകളും രക്ഷാപ്രവർത്തനത്തിന് വലിയ വെല്ലുവിളിയാണ്.
