വിറ്റ്സൺഡേയ്സ്: സമൂഹത്തിന് മാതൃകയായി ആഴ്ചതോറും ഒരുടണ്ണിലധികം മത്തങ്ങ സൗജന്യമായി വിതരണം ചെയ്ത് എൺപതുകാരനായ വിരമിച്ച കരിമ്പ് കർഷകൻ ഡാർസി എമേഴ്സൺ. കെൽസി ക്രീക്കിൽ 1918-ൽ സ്ഥാപിതമായ കുടുംബ ഫാമിൽ നിന്നാണ് ഇദ്ദേഹം ആഴ്ചയിൽ രണ്ടുതവണ തന്റെ വാഹനത്തിൽ (ute) മത്തങ്ങകളുമായി വിതരണത്തിന് ഇറങ്ങുന്നത്.
ബട്ടർനട്ട്, കെന്റ്, ബ്യൂഗിൾ തുടങ്ങിയ ഇനങ്ങളിൽപ്പെട്ട മത്തങ്ങകളാണ് പ്രോസർപൈൻ, കാനൺവേൽ, എയർലി ബീച്ച് എന്നിവിടങ്ങളിലെ ‘മീൽസ് ഓൺ വീൽസ്’ ചാരിറ്റി സ്ഥാപനങ്ങൾ, പള്ളികൾ, ഡേകെയറുകൾ, മറ്റ് സാമൂഹിക കൂട്ടായ്മകൾ എന്നിവയ്ക്ക് പൂർണ്ണമായും സൗജന്യമായി എത്തിച്ചുനൽകുന്നത്. യാതൊരുവിധ പ്രതിഫലവും വാങ്ങാതെ, ഒരു നിബന്ധനകളുമില്ലാതെയാണ് ഈ സഹായഹസ്തം.
ഡാർസിയുടെ നിസ്വാർത്ഥ സേവനത്തെ ആദരിച്ച് നാട്ടുകാർ അദ്ദേഹത്തിന്റെ വാഹനത്തിന് നെറ്റും പ്രൊഫഷണൽ സൈൻബോർഡും സമ്മാനമായി നൽകി. ഇതിനുപുറമേ, പ്രദേശത്തെ ഒരു റസ്റ്റോറന്റ് അദ്ദേഹത്തിന്റെ പേരിൽ ‘ഡാർസീസ് പംപ്കിൻ സൂപ്പ്’ വിളമ്പാൻ തുടങ്ങിയപ്പോൾ, മറ്റൊരു പ്രദേശവാസി അദ്ദേഹത്തിന്റെ കാരുണ്യപ്രവർത്തനങ്ങളെ ആസ്പദമാക്കി കുട്ടികൾക്കായി ഒരു പുസ്തകവും രചിക്കുന്നുണ്ട്.
പ്രായത്തിന്റെ അവശതകൾ മൂലം ഭാവിയിൽ ഡാർസിക്ക് സാധിക്കാതെ വന്നാലും ഈ സൗജന്യ വിതരണം താൻ തുടർന്നു കൊണ്ടുപോകുമെന്ന് മകൻ ക്രെയ്ഗ് വ്യക്തമാക്കി. മറ്റുള്ളവരെ സഹായിക്കുക എന്നതുമാത്രമാണ് തന്റെ ലക്ഷ്യമെന്നും അതാണ് ജീവിതത്തിന്റെ അർത്ഥമെന്നും ഡാർസി എമേഴ്സൺ വ്യക്തമാക്കുന്നു.
