കുപെർട്ടിനോ: 15 വർഷത്തെ നേതൃത്വത്തിന് ശേഷം ടിം കുക്ക് ആപ്പിൾ സിഇഒ പദവിയൊഴിഞ്ഞു. സെപ്റ്റംബർ 1 മുതൽ ആപ്പിളിന്റെ പുതിയ ചീഫ് എക്സിക്യൂട്ടീവ് ഓഫീസറായി ഹാർഡ്വെയർ എൻജിനീയറിങ് വിഭാഗം സീനിയർ വൈസ് പ്രസിഡന്റ് ജോൺ ടെർണസ് ചുമതലയേറ്റു. ഏപ്രിലിൽ തന്നെ ആപ്പിൾ ഡയറക്ടർ ബോർഡ് നേതൃത്വമാറ്റത്തിന് അംഗീകാരം നൽകിയിരുന്നു.
സിഇഒ സ്ഥാനമൊഴിഞ്ഞ ടിം കുക്ക് ആപ്പിൾ ബോർഡിന്റെ എക്സിക്യൂട്ടീവ് ചെയർമാനായി തുടരും. ആഗോള നയരൂപീകരണകരുമായുള്ള ഇടപെടലുകൾ ഉൾപ്പെടെ കമ്പനിയുടെ ചില പ്രവർത്തനങ്ങളിൽ അദ്ദേഹം തുടർന്നും പങ്കാളിയാകും. ആർതർ ലെവിൻസൺ നോൺ-എക്സിക്യൂട്ടീവ് ചെയർമാൻ സ്ഥാനത്തുനിന്ന് മാറി ലീഡ് ഇൻഡിപെൻഡന്റ് ഡയറക്ടറാകും.
1998ൽ ആപ്പിളിൽ ചേർന്ന കുക്ക് 2011ലാണ് സിഇഒയായത്. അദ്ദേഹത്തിന്റെ നേതൃത്വത്തിൽ ആപ്പിൾ വാച്ച്, എയർപോഡ്സ്, ആപ്പിൾ വിഷൻ പ്രോ തുടങ്ങിയ പുതിയ ഉൽപ്പന്ന വിഭാഗങ്ങൾ കമ്പനി അവതരിപ്പിച്ചു. ആപ്പിളിന്റെ സേവനമേഖലയും ഇക്കാലയളവിൽ വലിയ തോതിൽ വികസിച്ചു. കമ്പനിയുടെ വിപണി മൂല്യം ഏകദേശം 350 ബില്യൺ ഡോളറിൽനിന്ന് 4 ട്രില്യൺ ഡോളറിലേറെയായി ഉയർന്നതായും ആപ്പിൾ വ്യക്തമാക്കുന്നു.
2001ൽ ആപ്പിളിന്റെ പ്രൊഡക്റ്റ് ഡിസൈൻ ടീമിൽ ചേർന്ന ജോൺ ടെർണസ് 2013ൽ ഹാർഡ്വെയർ എൻജിനീയറിങ് വൈസ് പ്രസിഡന്റായി. 2021ൽ സീനിയർ വൈസ് പ്രസിഡന്റ് സ്ഥാനത്തെത്തി. ഐപാഡ്, എയർപോഡ്സ്, ഐഫോൺ, മാക്, ആപ്പിൾ വാച്ച് തുടങ്ങിയ ഉൽപ്പന്നങ്ങളുടെ ഹാർഡ്വെയർ വികസനത്തിൽ ടെർണസ് നിർണായക ചുമതലകൾ വഹിച്ചിട്ടുണ്ട്. പെൻസിൽവാനിയ സർവകലാശാലയിൽനിന്ന് മെക്കാനിക്കൽ എൻജിനീയറിങ്ങിൽ ബിരുദം നേടിയിട്ടുണ്ട്.
ആപ്പിളിന്റെ ഔദ്യോഗിക പ്രഖ്യാപനപ്രകാരം, ദീർഘകാല പിൻഗാമി പദ്ധതിയുടെ ഭാഗമായാണ് നേതൃത്വമാറ്റം നടപ്പാക്കിയത്.
