ന്യൂഡൽഹി: കോൺഗ്രസ് മുൻ ദേശീയ അധ്യക്ഷ സോണിയ ഗാന്ധിയുടെ ഓർമക്കുറിപ്പ് ‘Belonging: A Journey of Love’ നവംബർ 10ന് ഇന്ത്യയിൽ പുറത്തിറങ്ങും. ഹാർപ്പർ കോളിൻസ് ഇന്ത്യയാണ് പുസ്തകം പ്രസിദ്ധീകരിക്കുന്നത്. ഇന്ത്യയുടെ യാത്രയെക്കുറിച്ചുള്ള അപൂർവമായ അകക്കാഴ്ച പുസ്തകം നൽകുമെന്ന് പ്രസാധകർ അറിയിച്ചു.
പുസ്തകത്തിന്റെ ഇന്ത്യൻ പ്രസാധനവുമായി ബന്ധപ്പെട്ട് നേരത്തെ പെൻഗ്വിൻ റാൻഡം ഹൗസ് ഇന്ത്യ പിന്മാറിയത് വിവാദങ്ങൾക്ക് വഴിവെച്ചിരുന്നു. പുസ്തകത്തിലെ ചില ഭാഗങ്ങളിൽ മാറ്റം വരുത്താനുള്ള നിർദേശങ്ങൾ സോണിയ ഗാന്ധി അംഗീകരിക്കാത്തതിനെ തുടർന്നാണ് പെൻഗ്വിൻ പിന്മാറിയതെന്ന റിപ്പോർട്ടുകൾ പുറത്തുവന്നിരുന്നു. എന്നാൽ പുസ്തകത്തിലെ വസ്തുതകളെക്കുറിച്ച് സോണിയ ഗാന്ധിയുമായി ചർച്ച നടത്തിയിരുന്നെന്നും പ്രസിദ്ധീകരണം ഏറ്റെടുക്കാതിരുന്നതിന് ഇതല്ല കാരണമെന്നും പെൻഗ്വിൻ വിശദീകരിച്ചിരുന്നു.
സോണിയ ഗാന്ധിയുടെ ജീവിതത്തിലെ നിർണായക സംഭവങ്ങൾ പുസ്തകത്തിൽ ഉൾപ്പെടുത്തിയിട്ടുണ്ടെന്നാണ് സൂചന. പ്രധാനമന്ത്രി നരേന്ദ്ര മോദി, ആർഎസ്എസ്, ചൈനയുടെ കടന്നുകയറ്റം തുടങ്ങിയ വിഷയങ്ങളുമായി ബന്ധപ്പെട്ട ഭാഗങ്ങളിൽ മാറ്റം ആവശ്യപ്പെട്ടെന്ന ആരോപണങ്ങളും നേരത്തെ ഉയർന്നിരുന്നു. എന്നാൽ 2015ൽ സോണിയ ഗാന്ധിയും മുൻ പ്രധാനമന്ത്രി മൻമോഹൻ സിങ്ങും നരേന്ദ്ര മോദിയെ കണ്ട സംഭവവുമായി ബന്ധപ്പെട്ട ഭാഗത്തും മാറ്റം ആവശ്യപ്പെട്ടെന്ന പ്രചാരണം കോൺഗ്രസ് ഔദ്യോഗികമായി സ്ഥിരീകരിച്ചിട്ടില്ല.
അതിനിടെ, സോണിയ ഗാന്ധിയുടെ പുസ്തകം അന്താരാഷ്ട്ര തലത്തിൽ പെൻഗ്വിന്റെ സഹസ്ഥാപനമായ ആൽഫ്രഡ് എ. നോഫ് പ്രസിദ്ധീകരിക്കും. പുസ്തകത്തിന്റെ അന്താരാഷ്ട്ര പ്രസിദ്ധീകരണ തീയതിയും നവംബർ 10 ആണ്.
