സാൻ ജോസ്: ഇന്ത്യൻ വംശജനായ അനിൽ ചക്രവർത്തിയെ അഡോബിന്റെ പുതിയ പ്രസിഡന്റും ചീഫ് എക്സിക്യൂട്ടീവ് ഓഫീസറുമായി നിയമിച്ചു. 2026 ഡിസംബർ 1 മുതൽ അദ്ദേഹം ചുമതലയേൽക്കും. നിലവിലെ സിഇഒ ശന്തനു നാരായൺ എക്സിക്യൂട്ടീവ് ചെയർ സ്ഥാനത്തേക്ക് മാറും.
നിലവിൽ അഡോബിന്റെ Customer Experience Orchestration ബിസിനസിന്റെയും ആഗോള ഫീൽഡ് ഓപ്പറേഷൻസിന്റെയും പ്രസിഡന്റാണ് ചക്രവർത്തി. 2020 ജനുവരിയിലാണ് അദ്ദേഹം അഡോബിൽ ചേർന്നത്. പിന്നീട് ഡിജിറ്റൽ എക്സ്പീരിയൻസ് ബിസിനസിന്റെയും ആഗോള ഫീൽഡ് ഓപ്പറേഷൻസിന്റെയും ചുമതല വഹിച്ചു. 2021 ഡിസംബറിൽ ഡിജിറ്റൽ എക്സ്പീരിയൻസ് വിഭാഗത്തിന്റെ പ്രസിഡന്റായി.
അഡോബിൽ ചേരുന്നതിന് മുമ്പ് ചക്രവർത്തി ഡാറ്റാ മാനേജ്മെന്റ് സോഫ്റ്റ്വെയർ കമ്പനിയായ ഇൻഫോർമാറ്റിക്കയുടെ സിഇഒ ആയിരുന്നു. സിമാൻടെക്, വെരിസൈൻ, മക്കിൻസി തുടങ്ങിയ സ്ഥാപനങ്ങളിലും വിവിധ നേതൃത്വ പദവികളിൽ പ്രവർത്തിച്ചിട്ടുണ്ട്. ഐഐടി ബിഎച്ച്യുവിൽ നിന്ന് കമ്പ്യൂട്ടർ സയൻസിൽ ബി.ടെക്കും മസാച്യുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നിന്ന് (MIT) മാസ്റ്റേഴ്സ്, പിഎച്ച്ഡി ബിരുദങ്ങളും നേടിയിട്ടുണ്ട്.
അഡോബിന്റെ ആർട്ടിഫിഷ്യൽ ഇന്റലിജൻസ് അധിഷ്ഠിത ഉൽപ്പന്നങ്ങളും സേവനങ്ങളും കൂടുതൽ വികസിപ്പിക്കുന്നതിനുള്ള നിർണായക ഘട്ടത്തിലാണ് പുതിയ നേതൃത്വം വരുന്നത്. എഐ അടിസ്ഥാനമാക്കിയുള്ള ഡിസൈൻ സോഫ്റ്റ്വെയറുകളുടെ വർധിച്ചുവരുന്ന മത്സരമാണ് അഡോബ് നേരിടുന്ന പ്രധാന വെല്ലുവിളികളിലൊന്ന്.
18 വർഷത്തിലേറെയായി അഡോബിനെ നയിച്ച ശന്തനു നാരായൺ സിഇഒ സ്ഥാനത്ത് നിന്ന് മാറിയ ശേഷവും കമ്പനിയുടെ തന്ത്രപരമായ മാറ്റങ്ങൾക്ക് പിന്തുണ നൽകുമെന്ന് അഡോബ് അറിയിച്ചു. ചക്രവർത്തിയുടെ ബിസിനസ് പരിചയവും കമ്പനിയുടെ പ്രവർത്തനങ്ങളെക്കുറിച്ചുള്ള ആഴത്തിലുള്ള അറിവും പുതിയ ചുമതലയിൽ സഹായകരമാകുമെന്ന് നാരായൺ വ്യക്തമാക്കി.
അഡോബിന്റെ പുതിയ സിഇഒയെ പ്രഖ്യാപിച്ചതിന് പിന്നാലെ കമ്പനിയുടെ ഓഹരിയിൽ ഇടിവുണ്ടായതായി വിപണി റിപ്പോർട്ടുകൾ സൂചിപ്പിക്കുന്നു. അതേസമയം, എഐ കാലഘട്ടത്തിൽ കമ്പനിയുടെ തന്ത്രപരമായ ദിശ സംബന്ധിച്ച് പുതിയ നേതൃത്വം എങ്ങനെ മുന്നോട്ടുപോകുമെന്നതിലേക്കാണ് നിക്ഷേപകരുടെ ശ്രദ്ധ.
