കാൻബറ: വാടകയോ ഭവനവായ്പയോ തിരിച്ചടയ്ക്കുന്ന ഓസ്ട്രേലിയക്കാർക്ക് അവരുടെ ഭാവി സൂപ്പർ അന്യുവേഷൻ (സൂപ്പർ) വിഹിതത്തിൽ ഒരു പങ്ക് ശമ്പളമായി കൈപ്പറ്റാൻ അവസരമൊരുക്കുന്ന പുതിയ നിർദ്ദേശവുമായി പോളിൻ ഹാൻസന്റെ വൺ നേഷൻ പാർട്ടി. ഭവന പ്രതിസന്ധിയും ജീവിതച്ചെലവും കാരണം ബുദ്ധിമുട്ടുന്ന കുടുംബങ്ങൾക്ക് അടിയന്തര ആശ്വാസം നൽകുകയാണ് ഈ നയത്തിന്റെ ലക്ഷ്യമെന്ന് പാർട്ടി വ്യക്തമാക്കി.
നിർദ്ദേശപ്രകാരം, തൊഴിലുടമകൾ നൽകേണ്ട മുഴുവൻ 12 ശതമാനം സൂപ്പർ വിഹിതവും തുടർന്നും നൽകേണ്ടതുണ്ട്. എന്നാൽ ഇതിൽ 3 ശതമാനം ജീവനക്കാർക്ക് അവരുടെ ടേക്ക്-ഹോം പേയായി (ശമ്പളമായി) കൈപ്പറ്റാൻ അനുവാദമുണ്ടാകും; ബാക്കി 9 ശതമാനം വിഹിതം സൂപ്പർ ഫണ്ടിലേക്ക് പോകും. പരമാവധി മൂന്ന് വർഷത്തേക്ക് മാത്രമായിരിക്കും ഈ ആനുകൂല്യം ലഭ്യമാകുക. കൂടാതെ, നിലവിലുള്ള സൂപ്പർ ബാലൻസുകളിൽ യാതൊരുവിധ കുറവും വരുത്താതെ ഭാവിയിലെ വിഹിതത്തിന് മാത്രമായിരിക്കും ഇത് ബാധകമാക്കുക.
ഈ മാറ്റം നടപ്പിലായാൽ ശരാശരി വരുമാനമുള്ള ഒരു തൊഴിലാളിക്ക് ആഴ്ചയിൽ അധികമായി 44 ഡോളറും, ദമ്പതികളായ ജോലിക്കാർക്ക് ആഴ്ചയിൽ ഏകദേശം 82 ഡോളറും അധികമായി കൈയ്യിലെത്തും. ഭവനച്ചെലവുകളും ദൈനംദിന ആവശ്യങ്ങളും നിറവേറ്റാൻ ഇത് ജനങ്ങൾക്ക് വലിയ ആശ്വാസമാകുമെന്നാണ് വൺ നേഷൻ ചൂണ്ടിക്കാട്ടുന്നത്.
അതേസമയം, പദ്ധതിക്കെതിരെ രൂക്ഷമായ വിമർശനവുമായി സാമ്പത്തിക വിദഗ്ധരും രംഗത്തെത്തിയിട്ടുണ്ട്. ഈ നിർദ്ദേശം രാജ്യത്തെ പണപ്പെരുപ്പം വർദ്ധിപ്പിക്കുമെന്നും, നിലവിൽ 30 വയസ്സ് പ്രായമുള്ള ഒരു തൊഴിലാളിക്ക് വിരമിക്കൽ കാലത്ത് സൂപ്പർ ഫണ്ടിൽ നിന്ന് ലഭിക്കേണ്ട തുകയിൽ ഏകദേശം 25,000 ഡോളറിന്റെ വരെ നഷ്ടമുണ്ടാക്കുമെന്നും വിമർശകർ മുന്നറിയിപ്പ് നൽകുന്നു. ഇതോടെ, ഇപ്പോഴത്തെ സാമ്പത്തിക ആശ്വാസം വേണമോ അതോ ഭാവിയിലെ റിട്ടയർമെന്റ് സുരക്ഷിതമാക്കണമോ എന്ന കാര്യത്തിൽ രാജ്യത്ത് വലിയ ചർച്ചകളാണ് നടക്കുന്നത്.
