സിഡ്നി: തെക്കുപടിഞ്ഞാറൻ സിഡ്നിയിലെ പഞ്ച്ബൗളിൽ പൊതുസ്ഥലത്തുണ്ടായ വെടിവെപ്പിൽ യുവാവ് കൊല്ലപ്പെട്ടു. റോസ്മോർ അവന്യൂവിലെ കമ്മ്യൂണിറ്റി സെന്റർ കാർ പാർക്കിംഗിലാണ് സംഭവം.
ബുധനാഴ്ച വൈകുന്നേരം 5.50-ഓടെയാണ് അടിയന്തര രക്ഷാപ്രവർത്തകർക്ക് വിവരം ലഭിക്കുന്നത്. വെടിയേറ്റ നിലയിൽ കാർ പാർക്കിംഗിൽ കണ്ടെത്തിയ യുവാവിന് പാരാമെഡിക്കൽ സംഘം ഉടൻ തന്നെ അടിയന്തര ചികിത്സ നൽകിയെങ്കിലും സംഭവസ്ഥലത്തു വെച്ചുതന്നെ മരണം സംഭവിച്ചു. വെടിവെപ്പിന് പിന്നാലെ പ്രദേശത്തുനിന്ന് ഒരു വാഹനം വേഗത്തിൽ ഓടിച്ചുപോകുന്നത് കണ്ടതായി പോലീസിന് വിവരം ലഭിച്ചിട്ടുണ്ട്.
സംഭവസ്ഥലം പൂർണമായി പോലീസ് നിയന്ത്രണത്തിലാക്കി ക്രൈം സീനായി പ്രഖ്യാപിച്ചിട്ടുണ്ട്. കേസിൽ ഇതുവരെ ആരെയും അറസ്റ്റ് ചെയ്തിട്ടില്ല. കൊല്ലപ്പെട്ടയാളെ ഔദ്യോഗികമായി തിരിച്ചറിഞ്ഞിട്ടില്ലെന്നും സംഭവത്തിന് പിന്നിലെ സാഹചര്യങ്ങളെക്കുറിച്ച് വിശദമായ അന്വേഷണം ആരംഭിച്ചതായും പോലീസ് വ്യക്തമാക്കി. സംഭവവുമായി ബന്ധപ്പെട്ട് എന്തെങ്കിലും വിവരങ്ങളോ ഡാഷ്ക്യാം, മൊബൈൽ ഫോൺ ദൃശ്യങ്ങളോ ഉള്ളവർ 1800 333 000 എന്ന നമ്പറിൽ ക്രൈം സ്റ്റോപ്പേഴ്സുമായി ബന്ധപ്പെടണമെന്ന് പോലീസ് അഭ്യർഥിച്ചു.
