മുംബൈ: ഐഐടി ബോംബെയിലെ രണ്ടാം വർഷ ബിടെക് വിദ്യാർഥിയെ വെള്ളിയാഴ്ച ക്യാംപസിലെ ഹോസ്റ്റൽ മുറിയിൽ മരിച്ച നിലയിൽ കണ്ടെത്തി. എനർജി സയൻസ് ആൻഡ് എൻജിനീയറിങ് വിഭാഗത്തിലെ വിദ്യാർഥിയാണ് മരിച്ചത്. സംഭവത്തിൽ പൊലീസ് അന്വേഷണം ആരംഭിച്ചു.
പരീക്ഷയ്ക്കിടെ മൊബൈൽ ഫോൺ ഉപയോഗിച്ചതായി കണ്ടെത്തിയതിനെ തുടർന്നാണ് സംഭവം ശ്രദ്ധയിൽപ്പെട്ടത്. ഐഐടി ബോംബെയുടെ വിശദീകരണമനുസരിച്ച്, വിദ്യാർഥി പരീക്ഷാ ചോദ്യപേപ്പർ ചാറ്റ്ജിപിടിയിൽ അപ്ലോഡ് ചെയ്ത് ഉത്തരങ്ങൾ തേടിയിരുന്നു. എന്നാൽ സംഭവത്തിൽ വിദ്യാർഥിക്കെതിരെ അച്ചടക്ക നടപടി ആരംഭിച്ചിരുന്നില്ലെന്നും ഇൻസ്ട്രക്ടറും വിഭാഗം മേധാവിയും അദ്ദേഹവുമായി സംസാരിച്ച് കൗൺസലിങ് നൽകിയെന്നും പഠനത്തെ പ്രതികൂലമായി ബാധിക്കുന്ന നടപടി ഉണ്ടാകില്ലെന്ന് ഉറപ്പുനൽകിയിരുന്നുവെന്നും സ്ഥാപനം അറിയിച്ചു.
വിദ്യാർഥിയുടെ മരണത്തിന് പിന്നാലെ 400ലേറെ വിദ്യാർഥികൾ ക്യാംപസിൽ പ്രതിഷേധിച്ചു. സംഭവത്തിന്റെ മുഴുവൻ വിവരങ്ങളും ഭരണകൂടം പുറത്തുവിടണമെന്നതടക്കമുള്ള ആവശ്യങ്ങളാണ് പ്രതിഷേധക്കാർ ഉന്നയിച്ചത്. ചില വിദ്യാർഥികൾ അച്ചടക്ക നടപടിയായി ഒരു വർഷത്തെ സസ്പെൻഷൻ ഭീഷണിയുണ്ടായിരുന്നുവെന്ന് ആരോപിച്ചെങ്കിലും ഇക്കാര്യം സ്വതന്ത്രമായി സ്ഥിരീകരിച്ചിട്ടില്ല.
വിദ്യാർഥികളുടെ പ്രതിഷേധത്തെ തുടർന്ന് ഐഐടി ബോംബെ ഡയറക്ടർ പ്രഫ. ഷിരീഷ് കേദാരെ വിദ്യാർഥികളുമായി കൂടിക്കാഴ്ച നടത്തി. വിദ്യാർഥി ക്ഷേമം, മാനസികാരോഗ്യ പിന്തുണ, ക്യാംപസിലെ വിദ്യാർഥി പ്രതിനിധിത്വം തുടങ്ങിയ വിഷയങ്ങളും പ്രതിഷേധത്തിനിടെ ഉയർന്നു. സംഭവത്തെക്കുറിച്ചും വിദ്യാർഥികൾ ഉന്നയിച്ച മറ്റ് വിഷയങ്ങളെക്കുറിച്ചും പരിശോധിക്കാൻ കമ്മിറ്റി രൂപീകരിക്കുമെന്ന് ഡയറക്ടർ അറിയിച്ചു.
അതേസമയം, വിദ്യാർഥിയുടെ മരണത്തിന് പിന്നിലെ കൃത്യമായ സാഹചര്യങ്ങൾ പൊലീസ് പരിശോധിച്ചുവരികയാണ്. കുടുംബാംഗങ്ങളുടെയും ക്യാംപസിലെ വിദ്യാർഥികളുടെയും മൊഴികൾ രേഖപ്പെടുത്തുന്നതായും റിപ്പോർട്ടുകളുണ്ട്.
