മെൽബൺ: വിവേചന വിരുദ്ധ നിയമങ്ങൾ ലംഘിച്ച് ജീവനക്കാരനെ അന്യായമായി പിരിച്ചുവിട്ട സംഭവത്തിൽ മെൽബണിലെ ബോറൂണ്ടാറ കൗൺസിലിന് (Boroondara Council) വിക്ടോറിയൻ സിവിൽ ആൻഡ് അഡ്മിനിസ്ട്രേറ്റീവ് ട്രിബ്യൂണൽ (VCAT) ഒൻപത് ലക്ഷത്തോളം ഡോളർ (ഏകദേശം $900,000) പിഴ ചുമത്തി. മുൻ ലോക്കൽ ലോസ് ഓഫീസറായ വാറൻ നോർട്ടനാണ് കൗൺസിൽ നഷ്ടപരിഹാരം നൽകേണ്ടത്.
2016-ൽ ജോലിസ്ഥലത്തുണ്ടായ പരിക്കിനെത്തുടർന്ന് ആരോഗ്യപ്രശ്നങ്ങൾ നേരിട്ടിരുന്ന നോർട്ടൻ ഉപയോഗിച്ചിരുന്ന വിശാലമായ ഹ്യുണ്ടായ് എച്ച് 1 വാൻ മാറ്റി, 2023-ൽ കൗൺസിൽ പകരം ചെറിയ ഹ്യുണ്ടായ് ഹാച്ച്ബാക്ക് കാർ നൽകിയിരുന്നു. എന്നാൽ ഈ ചെറിയ വാഹനത്തിന്റെ ഉപയോഗം അദ്ദേഹത്തിന് കടുത്ത മൈഗ്രേനും കഴുത്തുവേദനയും വീണ്ടും വഷളാക്കാൻ കാരണമായതായി ട്രിബ്യൂണൽ വിലയിരുത്തി. ചെറിയ അധികച്ചെലവിൽ അദ്ദേഹത്തിന് അനുയോജ്യമായ വാഹനം നൽകാൻ സാധിക്കുമായിരുന്നിട്ടും കൗൺസിൽ അതിന് തയ്യാറായില്ലെന്ന് ട്രിബ്യൂണൽ കണ്ടെത്തി.
തനിക്ക് യാതൊരുവിധ അച്ചടക്ക നടപടികളുടെയും പശ്ചാത്തലമില്ലാതിരുന്നിട്ടും, 2024 ഒക്ടോബറിൽ ഒരു ‘അനൗപചാരിക’ യോഗത്തിലേക്ക് വിളിച്ചുവരുത്തി പെട്ടെന്ന് തന്നെ ജോലിയിൽനിന്ന് പിരിച്ചുവിടുകയായിരുന്നുവെന്ന് നോർട്ടൻ വ്യക്തമാക്കി. ഔദ്യോഗിക കാറും ഫോണും ഉടനടി തിരികെ വാങ്ങിയ അധികൃതർ, സഹപ്രവർത്തകരുടെ മുന്നിൽ വെച്ച് കാംബർവെല്ലിലെ ഹെഡ്ക്വാർട്ടേഴ്സ് കെട്ടിടത്തിൽനിന്ന് അദ്ദേഹത്തെ പുറത്താക്കുകയും ചെയ്തു. തുടർന്ന് ഒരു പാർക്കിംഗ് ഓഫീസറുടെ ഫോൺ കടം വാങ്ങി ഭാര്യയെ വിളിച്ചാണ് വീട്ടിലേക്ക് മടങ്ങാൻ ഊബർ ടാക്സി ഏർപ്പാടാക്കിയതെന്നും അദ്ദേഹം വെളിപ്പെടുത്തി. അതേസമയം, വിവേചനം കാണിച്ചിട്ടില്ലെന്ന നിലപാടിൽ ഉറച്ചുനിൽക്കുന്ന കൗൺസിൽ, വിധിക്കെതിരെ അപ്പീൽ നൽകാനുള്ള സാധ്യതകൾ പരിശോധിച്ചുവരികയാണ്.
