ന്യൂഡൽഹി: ഉത്തരേന്ത്യൻ മഹാസമുദ്രത്തിൽ ഇന്ത്യൻ നാവികസേനയുടെ യുദ്ധക്കപ്പലായ ഐ.എൻ.എസ് കൊൽക്കത്തയും പാകിസ്ഥാൻ നാവികസേനയുടെ പി.എൻ.എസ് ഹുനൈൻ കപ്പലും തമ്മിൽ കൂട്ടിയിടിച്ച സംഭവത്തിൽ ഔദ്യോഗിക പ്രതികരണവുമായി ഇന്ത്യ. സെപ്റ്റംബർ 15-ന് നടന്ന സംഭവത്തിൽ പാക് കപ്പൽ അപലപനീയവും പ്രൊഫഷണൽ സമീപനത്തിന് നിരക്കാത്തതുമായ രീതിയിലാണ് പ്രവർത്തിച്ചതെന്ന് വിദേശകാര്യ മന്ത്രാലയ വക്താവ് രൺധീർ ജൈസ്വാൾ വ്യക്തമാക്കി.
പടിഞ്ഞാറൻ അറബിക്കടലിൽ ഒമാൻ ഉൾക്കടലിൽനിന്ന് ഏകദേശം 120 നോട്ടിക്കൽ മൈൽ അകലെ പതിവ് പട്രോളിംഗിലായിരുന്നു ഐ.എൻ.എസ് കൊൽക്കത്ത. പാക് കപ്പൽ നടത്തിയ അപകടകരമായ ഓവർടേക്കിങ്ങും ചട്ടങ്ങളുടെ ലംഘനവുമാണ് കൂട്ടിയിടിക്ക് വഴിവെച്ചത്. ഇരുരാജ്യങ്ങളുടെയും നാവിക യൂണിറ്റുകൾ തമ്മിൽ 3 നോട്ടിക്കൽ മൈൽ അകലം പാലിക്കണമെന്ന 1991-ലെ ഇന്ത്യ-പാകിസ്ഥാൻ സൈനിക കരാറിലെ ആർട്ടിക്കിൾ 10 വ്യവസ്ഥ പാക് കപ്പൽ ഇതോടെ ലംഘിച്ചു. കൂട്ടിയിടിയിൽ വലിയ കേടുപാടുകൾ ഒന്നും സംഭവിച്ചിട്ടില്ലാത്തതിനാൽ ഐ.എൻ.എസ് കൊൽക്കത്ത ഇപ്പോഴും സമുദ്രത്തിൽ പട്രോളിംഗ് തുടരുകയാണെന്ന് വിദേശകാര്യ മന്ത്രാലയം അറിയിച്ചു.
സംഭവത്തിൽ ഇന്ത്യ പാകിസ്ഥാന്റെ ചാർജ് ഡി അഫയേഴ്സിനെ വിളിച്ചുവരുത്തി ശക്തമായ പ്രതിഷേധം രേഖപ്പെടുത്തി. പാകിസ്ഥാന്റെ എക്സ്ക്ലൂസീവ് ഇക്കണോമിക് സോണിൽ ഇന്ത്യൻ കപ്പൽ ആക്രമണോത്സുകമായ നീക്കം നടത്തിയെന്ന പാക് നാവികസേനയുടെ വാദങ്ങൾ ഇന്ത്യ പൂർണ്ണമായും തള്ളി.
