തിരുവനന്തപുരം: സംസ്ഥാനത്ത് ഞായറാഴ്ച പെയ്ത ശക്തമായ മഴയിലും തുടർന്നുണ്ടായ മണ്ണിടിച്ചിലിലും മലവെള്ളപ്പാച്ചിലിലും ആറുപേർ മരിച്ചു. കോട്ടയം, ഇടുക്കി, മലപ്പുറം ജില്ലകളിലാണ് പ്രധാനമായും മഴക്കെടുതിയിൽ ആളപായമുണ്ടായത്. മലപ്പുറം ചോക്കാട് കോട്ടപ്പുഴയിലുണ്ടായ മലവെള്ളപ്പാച്ചിലിൽ നാലുപേരെ കാണാതായതായും റിപ്പോർട്ടുണ്ട്.
കോട്ടയം തീക്കോയിയിൽ ഈരാറ്റുപേട്ട–വാഗമൺ റോഡിൽ സ്കൂട്ടറിന് മുകളിലേക്ക് മണ്ണിടിഞ്ഞുവീണ് തമിഴ്നാട് സ്വദേശിനി സംഗീത അരുൾലാൽ മരിച്ചു. ഒപ്പമുണ്ടായിരുന്ന യുവതിക്ക് പരുക്കേറ്റു. പൂഞ്ഞാർ തെക്കേക്കരയിൽ വീടിന് മുകളിലേക്ക് മണ്ണിടിഞ്ഞുവീണ് 80കാരനായ ജോസഫും മരിച്ചു. മക്കളായ ജിമ്മി, ഡെന്നീസ് എന്നിവരെ പരുക്കുകളോടെ ആശുപത്രിയിൽ പ്രവേശിപ്പിച്ചു.
ഇടുക്കി വട്ടവട കൊട്ടാക്കമ്പൂർ മേഖലയിൽ കനത്ത മഴയെ തുടർന്നുണ്ടായ മണ്ണിടിച്ചിലിൽ ബാലകൃഷ്ണൻ, സഹോദരി ചിന്നു എന്നിവർ മരിച്ചു. ബാലകൃഷ്ണന്റെ ഭാര്യ മാരിയമ്മയ്ക്ക് പരുക്കേറ്റു. ഇവർ കൃഷിയിടത്തിലെ ഷെഡിൽ നിൽക്കുന്നതിനിടെയാണ് മണ്ണിടിച്ചിലുണ്ടായത്.
മലപ്പുറം ചോക്കാട്–അമരമ്പലം പഞ്ചായത്തുകൾക്കിടയിലെ കോട്ടപ്പുഴയിലാണ് അപ്രതീക്ഷിത മലവെള്ളപ്പാച്ചിലുണ്ടായത്. ശക്തമായ ഒഴുക്കിൽപ്പെട്ട ഒമ്പത് പേരിൽ മൂന്ന് പേരെ രക്ഷപ്പെടുത്തി. രണ്ട് പുരുഷന്മാരുടെ മൃതദേഹങ്ങൾ കണ്ടെത്തിയിട്ടുണ്ട്; ഇവരുടെ തിരിച്ചറിയൽ പൂർത്തിയായിട്ടില്ല. നാലുപേരെയാണ് നിലവിൽ കാണാതായതായി റിപ്പോർട്ട് ചെയ്യുന്നത്.
കനത്ത മഴയും മോശം കാലാവസ്ഥയും രക്ഷാപ്രവർത്തനത്തെ ബാധിച്ചു. കാണാതായവർക്കായുള്ള തിരച്ചിൽ സുരക്ഷാ ക്രമീകരണങ്ങളോടെ തുടരുകയാണ്. മലയോര മേഖലകളിൽ അനാവശ്യ യാത്രകൾ ഒഴിവാക്കാനും ജാഗ്രത പാലിക്കാനും അധികൃതർ നിർദേശം നൽകിയിട്ടുണ്ട്.
അതേസമയം, മഴയുടെ സാഹചര്യം വിലയിരുത്താൻ മുഖ്യമന്ത്രി വി.ഡി. സതീശൻ മണിക്കൂറുകൾ ഇടവിട്ട് സ്ഥിതിഗതികൾ പരിശോധിക്കാൻ നിർദേശം നൽകി. ദുരന്തസാധ്യതയുള്ള പ്രദേശങ്ങളിൽ ആവശ്യമായ മുൻകരുതൽ നടപടികളും ആളുകളെ മാറ്റിപ്പാർപ്പിക്കുന്ന നടപടികളും സ്വീകരിക്കാൻ ജില്ലാ ഭരണകൂടങ്ങൾക്ക് നിർദേശം നൽകിയിട്ടുണ്ട്. മലപ്പുറത്തെ തിരച്ചിൽ പ്രവർത്തനങ്ങൾക്ക് എൻഡിആർഎഫ് സംഘത്തെ വിന്യസിക്കാനും നിർദേശം നൽകിയതായി റിപ്പോർട്ടുണ്ട്.
