തിരുവനന്തപുരം: അർജന്റീന ഫുട്ബോൾ ടീമിനെയും ലയണൽ മെസിയെയും കേരളത്തിലെത്തിക്കുന്നതിനായി സംസ്ഥാന കായികവകുപ്പാണ് തന്നെ സമീപിച്ചതെന്ന് ജിഎസ്ടി ഇന്റലിജൻസ് ഉദ്യോഗസ്ഥർക്ക് നൽകിയ മൊഴിയിൽ റിപ്പോർട്ടർ ബ്രോഡ്കാസ്റ്റിങ് കോർപറേഷൻ മാനേജിങ് ഡയറക്ടർ ആന്റോ അഗസ്റ്റിൻ. മെസിയുടെ പേരിൽ നടന്ന സാമ്പത്തിക ഇടപാടുകളുമായി ബന്ധപ്പെട്ട് അന്വേഷണം നേരിടുന്ന സാഹചര്യത്തിലാണ് ആന്റോയുടെ മൊഴി പുറത്തുവന്നത്.
അർജന്റീന ഫുട്ബോൾ അസോസിയേഷന്റെ മത്സരം കേരളത്തിൽ നടത്താൻ താൽപര്യമുണ്ടോയെന്ന് ചോദിച്ചാണ് കായികവകുപ്പ് പ്രതിനിധികൾ സമീപിച്ചതെന്നാണ് ആന്റോയുടെ മൊഴി. നേരത്തെ സ്വർണാഭരണ വ്യാപാരികളുടെ സംഘടനയുമായി ഇതുസംബന്ധിച്ച് കരാറുണ്ടായിരുന്നുവെന്നും, അവർക്ക് ആവശ്യമായ തുക കണ്ടെത്താൻ കഴിയാത്ത സാഹചര്യത്തിലാണ് പുതിയ സ്പോൺസറെ തേടിയതെന്നും സർക്കാർ പ്രതിനിധി അറിയിച്ചതായി മൊഴിയിൽ പറയുന്നു.
സർക്കാർ പ്രതിനിധികൾ സമീപിക്കുന്നതിന് മുമ്പ് അർജന്റീനയുമായി സർക്കാർ തലത്തിൽ ചർച്ചകൾ നടന്നിരുന്നുവെന്നും അതിന്റെ അടിസ്ഥാനത്തിൽ പ്രത്യേക കമ്പനി (SPV) രൂപീകരിച്ച് മത്സരം നടത്താൻ തീരുമാനിച്ചിരുന്നുവെന്നും ആന്റോ മൊഴി നൽകിയിട്ടുണ്ട്. കേന്ദ്ര സർക്കാരിന്റെ അനുമതിയോടെയാണ് അർജന്റീനയുടെ കളക്ഷൻ ഏജന്റായ ടൂർപ്രോഡ് എന്റർ എൽഎൽസിക്ക് ഏകദേശം 14.5 മില്യൺ ഡോളർ (ഏകദേശം 139.1 കോടി രൂപ) കൈമാറിയതെന്നും അദ്ദേഹം അവകാശപ്പെടുന്നു.
എന്നാൽ കരാർ പ്രകാരമുള്ള മത്സരങ്ങൾ കേരളത്തിൽ നടന്നില്ലെന്നും കൈമാറിയ തുക തിരികെ ലഭിച്ചില്ലെന്നും ആന്റോയുടെ മൊഴിയിൽ പറയുന്നു. പണം തിരിച്ചുപിടിക്കുന്നതിനായി സ്വിറ്റ്സർലൻഡിലെ കോർട്ട് ഓഫ് ആർബിട്രേഷൻ ഫോർ സ്പോർട്സിൽ പരാതി നൽകിയതായും അദ്ദേഹം വ്യക്തമാക്കിയിട്ടുണ്ട്.
അതേസമയം, മെസിയെയും അർജന്റീന ടീമിനെയും കേരളത്തിലെത്തിക്കാനുള്ള പദ്ധതിയുടെ തുടക്കം സംബന്ധിച്ച് വ്യത്യസ്ത വാദങ്ങൾ ഉയർന്നിട്ടുണ്ട്. നേരത്തെ സ്പോർട്സ് വകുപ്പ് നടത്തിയ അന്വേഷണത്തിൽ സാമ്പത്തിക ഇടപാടുകളിലും നടപടിക്രമങ്ങളിലും ക്രമക്കേടുകൾ സംബന്ധിച്ച ചോദ്യങ്ങൾ ഉയർന്നിരുന്നു. ഏകദേശം 126 കോടി രൂപ അർജന്റീന ഫുട്ബോൾ അസോസിയേഷന് നൽകിയതായി സ്പോൺസർ അവകാശപ്പെട്ടിരുന്നെങ്കിലും പണം കൈമാറിയതിന്റെയോ എഎഫ്എ സ്വീകരിച്ചതിന്റെയോ രേഖകൾ ലഭ്യമല്ലെന്നായിരുന്നു അന്വേഷണത്തിലെ കണ്ടെത്തലുകളെന്ന് റിപ്പോർട്ടുകൾ പറയുന്നു.
മെസിയെ കേരളത്തിലെത്തിക്കുന്നതുമായി ബന്ധപ്പെട്ട സാമ്പത്തിക ഇടപാടുകൾ, സ്പോൺസർ തിരഞ്ഞെടുപ്പ്, സർക്കാർ നടപടിക്രമങ്ങൾ എന്നിവയെക്കുറിച്ച് പ്രത്യേക അന്വേഷണസംഘം അന്വേഷണം തുടരുകയാണ്. അതിനാൽ ആന്റോ അഗസ്റ്റിന്റെ മൊഴിയിലെ ആരോപണങ്ങൾ അന്വേഷണത്തിൽ സ്ഥിരീകരിക്കപ്പെടേണ്ടതുണ്ട്.
