അഹമ്മദാബാദ്: ഇന്ത്യയിലെ ആദ്യ എൽഎൻജി (Liquefied Natural Gas)–ഡീസൽ ഡ്യുവൽ ഫ്യൂവൽ ട്രെയിൻ ഗുജറാത്തിലെ സബർമതി റെയിൽവേ സ്റ്റേഷനിൽ നിന്ന് കേന്ദ്ര ആഭ്യന്തര-സഹകരണ മന്ത്രി അമിത് ഷായും ഗുജറാത്ത് മുഖ്യമന്ത്രി ഭൂപേന്ദ്ര പട്ടേലും ചേർന്ന് ഫ്ലാഗ് ഓഫ് ചെയ്തു. സെപ്റ്റംബർ 27നായിരുന്നു ചടങ്ങ്.
സബർമതി ഇന്റഗ്രേറ്റഡ് കോച്ചിങ് ഡിപ്പോയിലെ രണ്ട് 1,400 എച്ച്പി ഡ്രൈവിങ് പവർ കാറുകളാണ് ഡീസൽ–എൽഎൻജി ഡ്യുവൽ ഫ്യൂവൽ സംവിധാനത്തിലേക്ക് മാറ്റിയത്. പുതിയ സംവിധാനത്തിൽ എൽഎൻജിക്ക് ഡീസൽ ഉപയോഗത്തിന്റെ ഏകദേശം 40 ശതമാനം വരെ പകരം വയ്ക്കാനാകും. സംവിധാനത്തിന്റെ പ്രവർത്തനക്ഷമതയും വിശ്വാസ്യതയും പരിശോധിക്കുന്നതിനായി രണ്ട് പവർ കാറുകളിലും 2,000 കിലോമീറ്ററിലേറെ പരീക്ഷണ ഓട്ടം നടത്തിയിരുന്നു.
ട്രെയിൻ പൂർണമായും എൽഎൻജിയിൽ പ്രവർത്തിക്കുന്നതല്ല. ഇന്ധനലഭ്യത അനുസരിച്ച് എൽഎൻജിയും ഡീസലും ഉപയോഗിക്കാൻ കഴിയുന്ന രീതിയിലാണ് സംവിധാനം. ഡീസൽ ഉപയോഗം കുറയ്ക്കുന്നതിനൊപ്പം കാർബൺ ഡയോക്സൈഡ്, നൈട്രജൻ ഓക്സൈഡുകൾ, കണികാമലിനീകരണം എന്നിവ കുറയ്ക്കാനും ഇന്ധനച്ചെലവ് താഴ്ത്താനും പദ്ധതി ലക്ഷ്യമിടുന്നു. പരീക്ഷണാടിസ്ഥാനത്തിലുള്ള കണക്കുകൾ പ്രകാരം ഒരു പവർ കാറിന് പ്രതിവർഷം ഏകദേശം 11.9 ലക്ഷം രൂപയും എട്ട് കോച്ചുകളുള്ള റേക്കിന് ഏകദേശം 23.9 ലക്ഷം രൂപയും ഇന്ധനച്ചെലവിൽ ലാഭിക്കാനാകുമെന്നാണ് റെയിൽവേയുടെ വിലയിരുത്തൽ.
സബർമതി ഡിവിഷനിൽ റെയിൽവേ വികസനവുമായി ബന്ധപ്പെട്ട മറ്റ് പദ്ധതികളും ചടങ്ങിൽ ഉദ്ഘാടനം ചെയ്യുകയും ആരംഭിക്കുകയും ചെയ്തു. രാജ്യത്തെ ആദ്യ എൽഎൻജി ട്രെയിൻ ഉൾപ്പെടെ ഏകദേശം 1,472 കോടി രൂപയുടെ പദ്ധതികളാണ് ഇതിന്റെ ഭാഗമായി ഉൾപ്പെടുത്തിയതെന്ന് കേന്ദ്രസർക്കാർ അറിയിച്ചു.
റെയിൽവേയുടെ ഡീസൽ ഉപയോഗം കുറയ്ക്കുന്നതിനും ബദൽ ഇന്ധന സാങ്കേതികവിദ്യകൾ പ്രോത്സാഹിപ്പിക്കുന്നതിനുമുള്ള നടപടികളുടെ ഭാഗമായാണ് എൽഎൻജി–ഡീസൽ ഡ്യുവൽ ഫ്യൂവൽ ട്രെയിൻ അവതരിപ്പിച്ചിരിക്കുന്നത്.
