അങ്കാറ: സിറിയൻ സർക്കാരിന്റെയും ലെബനനിലെ ഹിസ്ബുള്ളയുടെയും പ്രതിനിധികൾ സെപ്റ്റംബറിൽ തുർക്കിയിൽ രഹസ്യ ചർച്ച നടത്തിയതായി ആറ് ഉറവിടങ്ങളെ ഉദ്ധരിച്ച് റോയിട്ടേഴ്സ് റിപ്പോർട്ട് ചെയ്തു. ഇരു വിഭാഗങ്ങൾക്കുമിടയിലെ സംഘർഷം കുറയ്ക്കുകയായിരുന്നു ചർച്ചയുടെ ലക്ഷ്യമെന്നാണ് റിപ്പോർട്ട്. എന്നാൽ ചർച്ച നടന്നെന്ന റിപ്പോർട്ട് തുർക്കിയും സിറിയയും നിഷേധിച്ചു.
സിറിയൻ രഹസ്യാന്വേഷണ വിഭാഗത്തിലെയും വിദേശകാര്യ മന്ത്രാലയത്തിലെയും ഉദ്യോഗസ്ഥരും ഹിസ്ബുള്ള പ്രതിനിധികളുമാണ് തുർക്കി സുരക്ഷാ, രഹസ്യാന്വേഷണ ഏജൻസികളുടെ ക്ഷണപ്രകാരം കൂടിക്കാഴ്ച നടത്തിയതെന്നാണ് റിപ്പോർട്ടിലെ വിശദീകരണം. അതിർത്തി കടന്നുള്ള ആയുധക്കടത്ത് തടയുന്നതും തെക്കൻ സിറിയയിലെ ഹിസ്ബുള്ളയുമായി ബന്ധമുള്ളതായി ഡമാസ്കസ് ആരോപിക്കുന്ന സ്ലീപ്പർ സെല്ലുകൾ ഇല്ലാതാക്കുന്നതും സിറിയൻ ഭാഗം ആവശ്യപ്പെട്ടതായി റിപ്പോർട്ടുണ്ട്.
അതേസമയം, ലെബനനിൽ ഹിസ്ബുള്ളയെ നിരായുധമാക്കുന്നതിനായി സിറിയൻ സൈന്യം ഇടപെടില്ലെന്ന് ഡമാസ്കസ് ഉറപ്പ് നൽകിയതായും ഉറവിടങ്ങളെ ഉദ്ധരിച്ച് റിപ്പോർട്ട് പറയുന്നു. എന്നാൽ അന്തിമ ധാരണയിലെത്തിയിരുന്നില്ലെന്നും റിപ്പോർട്ടിലുണ്ട്.
ഹിസ്ബുള്ളയുടെ പ്രധാന പിന്തുണക്കാരായ ഇറാൻ ചർച്ചയിൽ നേരിട്ട് പങ്കെടുത്തില്ല. ഇറാന് കൂടിക്കാഴ്ചയെക്കുറിച്ച് അറിവുണ്ടായിരുന്നെങ്കിലും നേരിട്ട് പങ്കാളിയാകാത്തതിൽ അസംതൃപ്തിയുണ്ടായിരുന്നുവെന്നാണ് ഒരു ലെബനീസ് സുരക്ഷാ ഉറവിടത്തെ ഉദ്ധരിച്ചുള്ള റിപ്പോർട്ട്.
എന്നാൽ തുർക്കി പ്രസിഡൻഷ്യൽ കമ്മ്യൂണിക്കേഷൻസ് ഡയറക്ടറേറ്റിന്റെ കീഴിലുള്ള ഡിസിൻഫർമേഷൻ സെന്റർ കൂടിക്കാഴ്ച നടന്നെന്ന വാർത്ത പൂർണമായും അടിസ്ഥാനരഹിതമാണെന്ന് വ്യക്തമാക്കി. സിറിയൻ സർക്കാരും റിപ്പോർട്ട് നിഷേധിച്ചു. അതിനാൽ ചർച്ച നടന്നതായി സ്വതന്ത്രമായി സ്ഥിരീകരിച്ചിട്ടില്ല.
