കാൻബറ: കുടിയേറ്റത്തെക്കുറിച്ചുള്ള രാഷ്ട്രീയ ചർച്ചകൾ രാജ്യത്ത് ശക്തമാകുന്നതിനിടെ, ഓസ്‌ട്രേലിയയുടെ ബഹുസ്വരതയെയും സാംസ്കാരിക വൈവിധ്യത്തെയും ശക്തമായി പ്രതിരോധിച്ച് പ്രധാനമന്ത്രി ആന്റണി ആൽബനീസ്. രാജ്യത്തെ ജനങ്ങൾ നേരിടുന്ന സാമ്പത്തിക പ്രതിസന്ധികളുടെ പേരിൽ വ്യത്യസ്ത പശ്ചാത്തലങ്ങളിൽ നിന്നുള്ള കുടിയേറ്റക്കാരെ പഴിചാരരുതെന്ന് അദ്ദേഹം മുന്നറിയിപ്പ് നൽകി. കാൻബറയിലെ പാർലമെന്റ് ഹൗസിൽ നടന്ന ഫെഡറേഷൻ ഓഫ് എത്തിനിക് കമ്മ്യൂണിറ്റീസ് കൗൺസിൽസ് ഓഫ് ഓസ്‌ട്രേലിയയുടെ ദേശീയ സമ്മേളനത്തിൽ സംസാരിക്കുകയായിരുന്നു അദ്ദേഹം.
ഓസ്‌ട്രേലിയയുടെ യഥാർത്ഥ കരുത്ത് അതിന്റെ വൈവിധ്യത്തിലും തലമുറകളായി എത്തിയ കുടിയേറ്റക്കാരുടെ സംഭാവനകളിലുമാണെന്ന് പ്രധാനമന്ത്രി വ്യക്തമാക്കി. ഒരിക്കലും നിലവിലില്ലാത്ത ഒരു സുവർണ്ണ ഭൂതകാലത്തെക്കുറിച്ചുള്ള വ്യാമോഹവും, ഒത്തൊരുമിച്ച് നാടിന്റെ ഭാവി രൂപപ്പെടുത്താനുള്ള പ്രതിബദ്ധതയും തമ്മിലുള്ള പോരാട്ടമാണ് നിലവിലെ ദേശീയ ചർച്ചയെന്ന് അദ്ദേഹം വിശേഷിപ്പിച്ചു. ആരോഗ്യപരിപാലനം, വയോജന സംരക്ഷണം, നിർമ്മാണ മേഖല, വിദ്യാഭ്യാസം, ഹോസ്പിറ്റാലിറ്റി, ചെറുകിട ബിസിനസ്സ് തുടങ്ങി മിക്കവാറും എല്ലാ മേഖലകളിലും ഓസ്‌ട്രേലിയയുടെ അഭിവൃദ്ധിക്ക് കുടിയേറ്റക്കാർ നിർണായക പങ്കുവഹിച്ചിട്ടുണ്ട്. രാജ്യത്തെ ചെറുകിട ബിസിനസ്സ് ഉടമകളിൽ മൂന്നിലൊന്നിലധികവും വിദേശത്ത് ജനിച്ചവരാണെന്ന കാര്യവും അദ്ദേഹം ചൂണ്ടിക്കാട്ടി.
കുടിയേറ്റ നിരക്ക്, ഭവനക്ഷാമം, വർദ്ധിച്ചുവരുന്ന ജീവിതച്ചെലവ് എന്നിവ ഉയർത്തിക്കാട്ടി പ്രധാന രാഷ്ട്രീയ പാർട്ടികൾ പരസ്പരം പഴിചാരുന്ന രാഷ്ട്രീയ സാഹചര്യത്തിലാണ് പ്രധാനമന്ത്രിയുടെ ഈ പ്രസ്താവന. സാധാരണ ജനങ്ങൾ അനുഭവിക്കുന്ന സാമ്പത്തിക ബുദ്ധിമുട്ടുകൾ തിരിച്ചറിയുന്നുണ്ടെന്നും, എന്നാൽ ജനങ്ങളുടെ ഈ നിരാശയെ ചൂഷണം ചെയ്ത് വ്യത്യസ്ത നിറമോ വംശമോ ഉള്ളവരിലേക്ക് കുറ്റം ചാർത്താനാണ് ചിലർ ശ്രമിക്കുന്നതെന്നും അദ്ദേഹം മുന്നറിയിപ്പ് നൽകി. സാമൂഹിക ഐക്യം കാത്തുസൂക്ഷിക്കണമെന്നും വംശീയതയെയും വിവേചനങ്ങളെയും ശക്തമായി ചെറുക്കണമെന്നും അദ്ദേഹം ഓസ്‌ട്രേലിയൻ ജനതയോട് ആഹ്വാനം ചെയ്തു.
ബഹുസ്വരത എന്നത് ഓസ്‌ട്രേലിയയിൽ പുതുതായി ഉണ്ടായ ഒന്നല്ലെന്നും മറിച്ച് രാജ്യചരിത്രത്തിന്റെ അവിഭാജ്യ ഘടകമാണെന്നും ആൽബനീസ് പറഞ്ഞു. സ്വന്തം മണ്ഡലമായ ഗ്രെയ്ൻഡ്‌ലറിന്റെ ചരിത്രം ഉദാഹരിച്ചുകൊണ്ട് ബ്രിട്ടീഷ്, ഐറിഷ്, ഗ്രീക്ക്, ഇറ്റാലിയൻ, പോർച്ചുഗീസ്, ലെബനീസ്, വിയറ്റ്നാമീസ്, ആഫ്രിക്കൻ ജനവിഭാഗങ്ങളുടെ തുടർച്ചയായ കുടിയേറ്റങ്ങൾ രാജ്യത്തിന്റെ സംസ്കാരത്തിലും സമ്പദ്‌വ്യവസ്ഥയിലും വരുത്തിയ മാറ്റങ്ങൾ അദ്ദേഹം വിവരിച്ചു. നിലവിലെ ഭരണകക്ഷിയിലെ അംഗങ്ങളുടെ പ്രാതിനിധ്യം പോലും ആധുനിക ഓസ്‌ട്രേലിയയുടെ വൈവിധ്യത്തെയാണ് പ്രതിഫലിപ്പിക്കുന്നത്. വിഭിന്ന സംസ്കാരങ്ങളെ വെറുതെ സഹിഷ്ണുതയോടെ കാണുക മാത്രമല്ല, ആഘോഷിക്കുകയാണ് വേണ്ടതെന്നും ലൂണാർ ന്യൂ ഇയർ, റമദാൻ തുടങ്ങിയ വിവിധ ആഘോഷങ്ങൾ സമൂഹത്തെ ഒന്നിപ്പിക്കാൻ സഹായിക്കുന്നുണ്ടെന്നും അദ്ദേഹം കൂട്ടിച്ചേർത്തു.
