സെൻട്രൽ കോസ്റ്റ്: ജലാശയങ്ങളുടെ ഭംഗി തികച്ചും വ്യത്യസ്തമായ വെളിച്ചത്തിൽ അടുത്തറിയാൻ സഞ്ചാരികൾക്കായി അപൂർവ്വ അവസരമൊരുങ്ങുന്നു. രാത്രിയുടെ പശ്ചാത്തലത്തിൽ സെൻട്രൽ കോസ്റ്റിലെ കായലുകളും ജലാശയങ്ങളും തുഴഞ്ഞു കാണാൻ സഹായിക്കുന്ന ‘ഗ്ലോ കയാക്കിംഗ്’ ഗൈഡഡ് ടൂർ നവംബറിൽ ആരംഭിക്കും.
താഴ്ഭാഗത്ത് പ്രകാശം പരത്തുന്ന സുതാര്യമായ (ക്ലിയർ) കയാക്കുകളിലിരുന്നാണ് ഈ രാത്രിയാത്രാനുഭവം ഒരുക്കിയിരിക്കുന്നത്. തെളിഞ്ഞ സാന്ത്വനഭംഗിയിൽ ജലാശയങ്ങളിലൂടെ തുഴഞ്ഞുപോകുമ്പോൾ, അവിടുത്തെ സവിശേഷമായ ആവാസവ്യവസ്ഥയെയും വന്യജീവികളെയും ചരിത്രങ്ങളെയും തികച്ചും പുതിയൊരു കാഴ്ചപ്പാടിൽ അനുഭവിച്ചറിയാൻ സഞ്ചാരികൾക്ക് സാധിക്കും.
2026 നവംബർ മാസത്തിൽ ദി എൻട്രൻസ് നോർത്ത് , വോയ് വോയ് (Woy Woy), ഗ്വാണ്ടലൻ എന്നീ കേന്ദ്രങ്ങളിലാണ് പരിപാടി സംഘടിപ്പിക്കുന്നത്. 13 വയസോ അതിൽ കൂടുതലോ പ്രായമുള്ളവർക്കാണ് ഇതിൽ പങ്കെടുക്കാൻ അവസരമുള്ളത്. പങ്കെടുക്കുന്നവർ സ്വയം കയാക്കിൽ കയറാനും ഇറങ്ങാനും പ്രാപ്തരായിരിക്കണമെന്നും ഏകദേശം 60 മിനിറ്റോളം തുഴയാൻ ശാരീരികക്ഷമതയുള്ളവരായിരിക്കണമെന്നും നിർദ്ദേശമുണ്ട്.
താൽപ്പര്യപത്രം വഴിയാണ് പരിപാടിയിലേക്കുള്ള ആളുകളെ തിരഞ്ഞെടുക്കുന്നത്. ഇത്തരത്തിൽ തിരഞ്ഞെടുക്കപ്പെടുന്നവർക്ക് 10 ഡോളർ എന്ന സബ്‌സിഡി നിരക്കിൽ ടിക്കറ്റുകൾ ലഭ്യമാക്കും.
