പാരിസ്: ഫ്രാൻസിൽ പ്രതിഷേധങ്ങൾ അക്രമാസക്തമായതിനെത്തുടർന്ന് വിവിധ മേഖലകളിൽ കർഫ്യൂവും പൊതുയോഗങ്ങൾക്ക് നിയന്ത്രണങ്ങളും ഏർപ്പെടുത്തി. ആഭ്യന്തര മന്ത്രി ലോറന്റ് നുനെസിന്റെ രാജി വാഗ്ദാനം പ്രസിഡന്റ് ഇമ്മാനുവൽ മാക്രോൺ തള്ളി. സുരക്ഷാ സംവിധാനങ്ങളുടെ നേതൃത്വം തുടരേണ്ടതുണ്ടെന്ന് ചൂണ്ടിക്കാട്ടിയാണ് തീരുമാനം.
ജീവിതച്ചെലവിലെ വർധന, ഇന്ധനവില, വിദ്യാഭ്യാസം, പൊതുസേവനങ്ങൾ തുടങ്ങിയ വിഷയങ്ങൾ ഉന്നയിച്ച് വിവിധ സംഘടനകളും വിദ്യാർഥികളും തൊഴിലാളികളും നടത്തിയ പ്രതിഷേധങ്ങളാണ് അക്രമത്തിലേക്ക് നീങ്ങിയത്. കടകൾ കൊള്ളയടിക്കുകയും വ്യാപാരസ്ഥാപനങ്ങൾക്ക് നാശനഷ്ടങ്ങൾ സംഭവിക്കുകയും ചെയ്തു.
ഫ്രാൻസിന്റെ ആഭ്യന്തര മന്ത്രാലയത്തിന്റെ കണക്കുകൾ പ്രകാരം പ്രതിഷേധവുമായി ബന്ധപ്പെട്ട് ഏകദേശം 2,400 പേരെ അറസ്റ്റ് ചെയ്തു. 997 പൊലീസ് ഉദ്യോഗസ്ഥർക്കും ജെൻഡർമുകൾക്കും പരുക്കേറ്റു; ഏഴുപേരുടെ പരുക്ക് ഗുരുതരമാണ്. അക്രമം നിയന്ത്രിക്കുന്നതിൽ വീഴ്ചയുണ്ടായെന്ന് മന്ത്രി സമ്മതിച്ചതിനു പിന്നാലെയാണ് രാജി വാഗ്ദാനം ചെയ്തത്.
സുരക്ഷാ സംവിധാനങ്ങളുടെ പ്രവർത്തനരീതിയിൽ മാറ്റങ്ങൾ വരുത്താനും സംഭവങ്ങളുമായി ബന്ധപ്പെട്ട രഹസ്യാന്വേഷണ, മുന്നൊരുക്ക വീഴ്ചകളിൽ കൂടുതൽ സുതാര്യത ഉറപ്പാക്കാനും മാക്രോൺ നിർദേശിച്ചു.
