മോസ്കോ: അമേരിക്കൻ പ്രസിഡന്റ് ഡോണൾഡ് ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്കോഫ് റഷ്യൻ പ്രസിഡന്റ് വ്ലാദിമിർ പുടിനുമായി കൂടിക്കാഴ്ച നടത്തി. യുക്രെയ്ൻ യുദ്ധം അവസാനിപ്പിക്കുന്നതിനുള്ള സമാധാന ചർച്ചകൾ പുനരാരംഭിക്കുന്നതും ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നതും ലക്ഷ്യമിട്ടായിരുന്നു കൂടിക്കാഴ്ച. ഇതിനിടെ, റഷ്യയിൽ തടവിലായിരുന്ന അമേരിക്കൻ പൗരൻ സ്റ്റീഫൻ ഹബ്ബാർഡിനെ മോചിപ്പിച്ചു.
സെന്റ് പീറ്റേഴ്‌സ്ബർഗിൽ ബുധനാഴ്ച നടന്ന കൂടിക്കാഴ്ചയ്ക്കിടെയാണ് 74 വയസ്സുകാരനായ ഹബ്ബാർഡിന്റെ മോചനം പുടിൻ അറിയിച്ചത്. യുക്രെയ്ൻ സൈന്യത്തിനുവേണ്ടി കൂലിപ്പടയാളിയായി പ്രവർത്തിച്ചെന്ന കേസിൽ ശിക്ഷിക്കപ്പെട്ട് 2022 മുതൽ റഷ്യൻ കസ്റ്റഡിയിലായിരുന്നു മിഷിഗൺ സ്വദേശിയായ മുൻ അധ്യാപകൻ. 2024-ൽ നടന്ന വിചാരണയിൽ ആറു വർഷവും പത്തുമാസവും തടവുശിക്ഷ വിധിച്ചിരുന്നു. എന്നാൽ തനിക്കെതിരായ ആരോപണങ്ങൾ തെറ്റാണെന്ന് ഹബ്ബാർഡ് അഭിഭാഷകൻ മുഖേന വ്യക്തമാക്കിയിരുന്നു.
ഹബ്ബാർഡിന്റെ മോചനത്തിനായി പുടിനോട് നേരിട്ട് ആവശ്യപ്പെട്ടിരുന്നതായി ട്രംപ് അറിയിച്ചു. മറ്റൊരു തടവുകാരനുമായി കൈമാറ്റം നടത്താതെയാണ് മോചനം സാധ്യമാക്കിയതെന്നും അദ്ദേഹം അവകാശപ്പെട്ടു. മാനുഷിക പരിഗണനയുടെ അടിസ്ഥാനത്തിലാണ് റഷ്യൻ പ്രസിഡന്റ് മോചനത്തിന് തീരുമാനമെടുത്തതെന്ന് ക്രെംലിൻ വക്താവും വ്യക്തമാക്കി.
യുക്രെയ്ൻ യുദ്ധം അവസാനിപ്പിക്കുന്നതിനുള്ള ത്രികക്ഷി സമാധാന ചർച്ചകൾ പുനരാരംഭിക്കുന്നതിനെക്കുറിച്ചും വിറ്റ്കോഫ് പുടിനുമായി ചർച്ച നടത്തി. റഷ്യ, യുക്രെയ്ൻ, അമേരിക്ക എന്നീ രാജ്യങ്ങൾ പങ്കെടുക്കുന്ന ചർച്ചകൾക്ക് തത്വത്തിൽ തയ്യാറാണെന്ന് പുടിൻ അറിയിച്ചതായി ഉദ്യോഗസ്ഥരെ ഉദ്ധരിച്ച് റിപ്പോർട്ടുകളുണ്ട്. എന്നാൽ യുദ്ധം അവസാനിപ്പിക്കുന്നതിനുള്ള അന്തിമ ധാരണയായിട്ടില്ല.
