അമരാവതി: അതിതീവ്ര ചുഴലിക്കാറ്റായി ശക്തിപ്രാപിച്ച അർണബ് ആന്ധ്രാപ്രദേശ്, ഒഡീഷ തീരങ്ങളിലേക്ക് അടുക്കുന്നു. ബുധനാഴ്ച ഉച്ചയ്ക്കു മുമ്പ് ചുഴലിക്കാറ്റ് കരതൊടുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. കാക്കിനടയ്ക്കും യാനത്തിനും ഇടയിലുള്ള തീരമേഖലയിലാണ് ചുഴലിക്കാറ്റ് കരയിൽ പ്രവേശിക്കാനിടയുള്ളത്. മണിക്കൂറിൽ 115 മുതൽ 125 കിലോമീറ്റർ വരെ വേഗത്തിൽ കാറ്റുവീശുമെന്നും ചിലയിടങ്ങളിൽ ഇത് 140 കിലോമീറ്റർ വരെ എത്തുമെന്നും പ്രവചനമുണ്ട്.
ചുഴലിക്കാറ്റ് ആന്ധ്രാ തീരത്തുനിന്ന് ഏകദേശം 300 കിലോമീറ്റർ അകലെയാണെന്നാണ് റിപ്പോർട്ട്. മണിക്കൂറിൽ 25 കിലോമീറ്റർ വേഗത്തിലാണ് തീരത്തേക്ക് നീങ്ങുന്നത്. ചുഴലിക്കാറ്റിന്റെ സ്വാധീനത്തിൽ വിശാഖപട്ടണത്ത് ശക്തമായ കാറ്റും കടൽക്ഷോഭവും അനുഭവപ്പെടുന്നുണ്ട്. ഒഡീഷയുടെ വിവിധ ഭാഗങ്ങളിലും മഴ ശക്തമായിട്ടുണ്ട്.
ചുഴലിക്കാറ്റ് ഭീഷണി കണക്കിലെടുത്ത് ആന്ധ്രാപ്രദേശ് സർക്കാർ വ്യാപകമായ മുന്നൊരുക്കങ്ങൾ സ്വീകരിച്ചു. കാക്കിനട തീരമേഖലയിൽനിന്ന് 89,000 പേരെ ഒഴിപ്പിച്ച് ദുരിതാശ്വാസ ക്യാമ്പുകളിലേക്ക് മാറ്റി. അപകടസാധ്യത കണക്കിലെടുത്ത് ഹോപ് ഐലൻഡിൽനിന്ന് ആളുകളെ പൂർണമായും ഒഴിപ്പിച്ചു. സംസ്ഥാനത്താകെ 1,400-ലധികം ദുരിതാശ്വാസ ക്യാമ്പുകൾ സജ്ജമാക്കിയിട്ടുണ്ട്. 4,000-ത്തിലധികം ഗർഭിണികളെ സുരക്ഷിത കേന്ദ്രങ്ങളിലേക്ക് മാറ്റി.
കടലിൽ പോയ മത്സ്യബന്ധന ബോട്ടുകളെല്ലാം സുരക്ഷിതമായി തീരത്ത് തിരിച്ചെത്തിച്ചു. ചുഴലിക്കാറ്റ് ബാധിക്കാൻ സാധ്യതയുള്ള പ്രദേശങ്ങളിൽ സ്കൂളുകൾക്ക് അവധി പ്രഖ്യാപിച്ചിട്ടുണ്ട്. മുൻകരുതലിന്റെ ഭാഗമായി 53 ട്രെയിനുകൾ റദ്ദാക്കി. വിശാഖപട്ടണം, വിജയവാഡ എന്നിവിടങ്ങളിൽനിന്നുള്ള വിമാന സർവീസുകളെയും ചുഴലിക്കാറ്റ് ബാധിച്ചേക്കാമെന്ന് എയർ ഇന്ത്യ മുന്നറിയിപ്പ് നൽകിയിട്ടുണ്ട്.
1970-നുശേഷം ആന്ധ്രാപ്രദേശ് നേരിട്ട 61 ചുഴലിക്കാറ്റുകളിൽ 11 എണ്ണം അതിതീവ്ര വിഭാഗത്തിൽപ്പെട്ടവയായിരുന്നു.
