കൊച്ചി: ചേരാനല്ലൂരിൽ തട്ടുകട ഉടമയുടെ ദാരുണ അന്ത്യത്തിനിടയാക്കിയ കാറപകടവുമായി ബന്ധപ്പെട്ട്, പ്രതിയായ പതിനേഴുകാരന്റെ പിതാവും അഡീഷണൽ ജഡ്ജിയുമായ ഉദ്യോഗസ്ഥനെ പോലീസ് ചോദ്യം ചെയ്തു. സംഭവത്തിൽ ഇരുവരുടെയും വിശദമായ മൊഴി അന്വേഷണ സംഘം രേഖപ്പെടുത്തിയെങ്കിലും, ഇവർ നൽകിയ വിശദീകരണങ്ങൾ പോലീസ് പൂർണ്ണമായും തള്ളി. യൂട്യൂബ് കണ്ടാണ് താൻ ഡ്രൈവിങ് പരിശീലിച്ചതെന്നും വാഹനം ഓടിക്കാനുള്ള അതിയായ ആഗ്രഹം മൂലം അച്ഛൻ അറിയാതെ കാറെടുക്കുകയായിരുന്നു എന്നുമാണ് പ്രായപൂർത്തിയാകാത്ത പ്രതിയുടെ മൊഴി. അതേസമയം, മകൻ കാറുമായി പോയ വിവരം താൻ അറിഞ്ഞിരുന്നില്ലെന്നാണ് ജഡ്ജി അന്വേഷണ സംഘത്തോട് വ്യക്തമാക്കിയത്.
എന്നാൽ യൂട്യൂബ് നോക്കി മാത്രം ഒരാൾക്ക് വാഹനം ഓടിക്കാനാകില്ലെന്നും, കുട്ടി മുമ്പും നിരത്തിലിറങ്ങി വാഹനം ഓടിച്ചിട്ടുണ്ടാകാമെന്നുമാണ് പോലീസിന്റെ നിഗമനം. ‘ഞായറാഴ്ച അച്ഛൻ ഉണരാൻ വൈകും’ എന്ന് കുട്ടി അയച്ച വാട്‌സ്ആപ്പ് സന്ദേശം ലഭിച്ചതോടെ പിതാവ് നൽകിയ മൊഴിയും വിശ്വാസത്തിലെടുക്കാൻ കഴിയില്ലെന്ന നിലപാടിലാണ് അന്വേഷണ സംഘം.
കേസന്വേഷണം ഏറ്റെടുത്ത ജില്ലാ ക്രൈം ബ്രാഞ്ച് കൂടുതൽ ശാസ്ത്രീയ തെളിവുകൾ ശേഖരിക്കുന്നതിനായി വിവിധ തലങ്ങളിൽ പരിശോധന ഊർജിതമാക്കിയിട്ടുണ്ട്. കഴിഞ്ഞ ഞായറാഴ്ച പുലർച്ചെ മൂന്ന് മണിയോടെ ചേരാനല്ലൂരിലായിരുന്നു നാടിനെ നടുക്കിയ ദുരന്തം. ജോലി കഴിഞ്ഞ് സ്കൂട്ടറിൽ വീട്ടിലേക്ക് മടങ്ങുകയായിരുന്ന തട്ടുകട ഉടമ ജയബാലകൃഷ്ണനെ, ജഡ്ജിയുടെ മകൻ അമിതവേഗതയിൽ പായിച്ച ബെൻസ് കാർ പിന്നിൽനിന്ന് ഇടിച്ച് തെറിപ്പിക്കുകയായിരുന്നു. സ്കൂട്ടർ പൂർണ്ണമായി തകർന്ന അപകടത്തിന് പിന്നാലെ, പതിനേഴുകാരനെയും ഇയാൾ ഓടിച്ച ആഡംബര കാറും പോലീസ് കസ്റ്റഡിയിലെടുത്തിരുന്നു.
