ന്യൂഡൽഹി: കഴിഞ്ഞ പത്ത് വർഷത്തിനിടെ ഇന്ത്യയിലുണ്ടായ അടിസ്ഥാന സൗകര്യ, ഡിജിറ്റൽ വികസനങ്ങളെ പ്രശംസിച്ച് പോളണ്ട് സ്വദേശിനിയായ ഡൊമിനിക പട്ടാലസ്-കാൽറ പങ്കുവെച്ച സോഷ്യൽ മീഡിയ വീഡിയോ ശ്രദ്ധേയമാകുന്നു. ഒരു പതിറ്റാണ്ട് മുമ്പ് താൻ ആദ്യമായി ഇന്ത്യയിലെത്തിയപ്പോഴത്തെ അവസ്ഥയുമായി ഇന്നത്തെ സാഹചര്യങ്ങളെ താരതമ്യം ചെയ്തുകൊണ്ടാണ് രാജ്യത്തെ അത്ഭുതകരമായ വളർച്ചയെക്കുറിച്ച് അവർ സംസാരിച്ചത്.
പത്ത് വർഷം മുമ്പ് നേരിട്ട് കറൻസി നൽകിയുള്ള പണമിടപാടുകളായിരുന്നു രാജ്യത്ത് വ്യാപകമായിരുന്നതെങ്കിൽ, ഇന്ന് ചെറിയ ചായക്കടകളിലും തെരുവോര കച്ചവടക്കാരുടെയടുത്തും വരെ ക്യു.ആർ കോഡ് സ്കാൻ ചെയ്തുള്ള യു.പി.ഐ ഡിജിറ്റൽ ഇടപാടുകൾ സർവസാധാരണമായി മാറിയെന്ന് ഡൊമിനിക ചൂണ്ടിക്കാട്ടുന്നു. സ്മാർട്ട്ഫോൺ വഴിയുള്ള ഈ പണമിടപാടുകൾ സാധാരണക്കാരുടെ ജീവിതത്തെ വലിയ തോതിൽ ലളിതമാക്കി.
രാജ്യത്തെ വിമാനത്താവളങ്ങളുടെ അത്യാധുനിക വികസനത്തെയും പുതിയ ടെർമിനലുകളെയും അവർ പ്രത്യേകം അഭിനന്ദിച്ചു. മികച്ച ഫ്ലൈറ്റ് കണക്റ്റിവിറ്റി അന്താരാഷ്ട്ര യാത്രകൾ ഏറെ സുഗമമാക്കിയെന്നും, സ്വന്തം നാടായ പോളണ്ടിലേക്ക് നേരിട്ടുള്ള വിമാന സർവീസുകൾ വഴി വളരെ എളുപ്പത്തിൽ യാത്ര ചെയ്യാൻ സാധിക്കുന്നുണ്ടെന്നും അവർ വ്യക്തമാക്കുന്നു.
റോഡ് ഗതാഗത രംഗത്തുണ്ടായ വിപ്ലവകരമായ മാറ്റങ്ങളും വിദേശ വനിത എടുത്തുപറയുന്നുണ്ട്. പുതിയ എക്സ്പ്രസ് വേകളും ഹൈവേകളും മേൽപ്പാലങ്ങളും മെട്രോ ലൈനുകളും വന്നതോടെ യാത്രാ സമയം പകുതിയിലധികമായി കുറഞ്ഞു. ഡെറാഡൂൺ, മീററ്റ് തുടങ്ങിയ നഗരങ്ങളിലേക്കുള്ള യാത്രകൾ ഇതിന് മികച്ച ഉദാഹരണമാണെന്ന് അവർ ചൂണ്ടിക്കാട്ടി.
കൂടാതെ, സാധനങ്ങൾ വാങ്ങാൻ നേരിട്ട് കടകളിൽ പോകേണ്ടിയിരുന്ന പഴയ രീതി മാറ്റിമറിച്ച്, ഫോണിലെ ഏതാനും ക്ലിക്കുകളിലൂടെ ഭക്ഷണവും മറ്റ് അവശ്യസാധനങ്ങളും ചുരുങ്ങിയ മിനിറ്റുകൾക്കുള്ളിൽ വീട്ടുപടിക്കൽ എത്തിക്കുന്ന ക്വിക്ക് ഡെലിവറി സംവിധാനങ്ങൾ ഇന്ത്യയിൽ വളരെ വേഗത്തിൽ വളർന്നതും അവർ പരാമർശിച്ചു.
റെയിൽവേ രംഗത്ത് വന്ദേഭാരത് പോലുള്ള ആധുനിക ട്രെയിനുകളുടെ വരവും, വിമാനത്താവളങ്ങൾക്ക് സമാനമായി നവീകരിച്ച റെയിൽവേ സ്റ്റേഷനുകളും, ഡിജിറ്റൽ ടിക്കറ്റിങ് സംവിധാനങ്ങളും യാത്രക്കാരുടെ യാത്രാനുഭവത്തെ അടിമുടി മാറ്റിമറിച്ചുവെന്നും ഡൊമിനിക തന്റെ വീഡിയോയിലൂടെ സാക്ഷ്യപ്പെടുത്തുന്നു.
