സിഡ്നി: ഓസ്‌ട്രേലിയയിലെ ഏറ്റവും പഴക്കമേറിയതും പ്രമുഖവുമായ ആഡംബര ഡിപ്പാർട്ട്‌മെന്റ് സ്റ്റോർ ശൃംഖലയായ ‘ഡേവിഡ് ജോൺസ്’ കടുത്ത സാമ്പത്തിക പ്രതിസന്ധിയെ തുടർന്ന് അഡ്മിനിസ്ട്രേഷനിലേക്ക്. 188 വർഷത്തെ നീണ്ട പ്രവർത്തന പാരമ്പര്യമുള്ള സ്ഥാപനം സാമ്പത്തിക ബാധ്യതകളെ തുടർന്ന് അഡ്മിനിസ്ട്രേറ്റർമാരുടെ നിയന്ത്രണത്തിലേക്ക് മാറിയതോടെ ഓസ്‌ട്രേലിയയിലും ന്യൂസിലൻഡിലുമായി ജോലി ചെയ്യുന്ന ആറായിരത്തിലധികം ജീവനക്കാരുടെ തൊഴിൽ അനിശ്ചിതത്വത്തിലായി.
ഓസ്‌ട്രേലിയയിലും ന്യൂസിലൻഡിലുമായി വ്യാപിച്ചുകിടക്കുന്ന 38 സ്റ്റോറുകളാണ് നിലവിൽ കമ്പനിക്കുള്ളത്. സ്ഥാപനത്തിന്റെ പ്രവർത്തനം പുനഃസംഘടിപ്പിക്കുന്നതിനുള്ള സാധ്യതകൾ അഡ്മിനിസ്ട്രേറ്റർമാരും റിസീവർമാരും സംയുക്തമായി പരിശോധിച്ച് വരികയാണ്. ബിസിനസ്സ് പുനഃക്രമീകരണത്തിന്റെ ഭാഗമായി ശൃംഖലയിലെ 26-ഓളം സ്റ്റോറുകൾ അടച്ചുപൂട്ടാൻ സാധ്യതയുണ്ടെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
ഓൺലൈൻ വ്യാപാര രംഗത്തുണ്ടായ വൻ കുതിപ്പും ജീവിതച്ചെലവ് ഉയർന്നതിനെ തുടർന്ന് ഉപഭോക്താക്കളുടെ വാങ്ങൽ ശേഷിയിൽ വന്ന ഇടിവുമാണ് സ്ഥാപനത്തെ പ്രതിസന്ധിയിലാക്കിയതെന്നാണ് വിലയിരുത്തൽ. ഓസ്‌ട്രേലിയൻ റീട്ടെയിൽ വിപണിയുടെ മുഖമുദ്രയായിരുന്ന ഡേവിഡ് ജോൺസിന്റെ നിലവിലെ പ്രതിസന്ധി രാജ്യത്തെ വാണിജ്യ മേഖലയിൽ വലിയ ആശങ്കയാണ് സൃഷ്ടിച്ചിരിക്കുന്നത്.
