പെർത്ത്: ആഗോളതലത്തിൽ ചെലവ് ചുരുക്കൽ നടപടികൾ കർശനമാക്കുന്നതിന്റെ ഭാഗമായി പ്രമുഖ ഓസ്‌ട്രേലിയൻ എണ്ണ-വാതക കമ്പനിയായ വുഡ്‌സൈഡ് എനർജി 500ലധികം ജീവനക്കാരെ പിരിച്ചുവിടാൻ ഒരുങ്ങുന്നു. കമ്പനിയുടെ മൊത്തം തൊഴിൽ ശക്തിയുടെ ഏകദേശം 10 ശതമാനത്തോളം വരുന്ന ജീവനക്കാരെയാണ് ഈ തീരുമാനം ബാധിക്കുക.
വുഡ്‌സൈഡ് എനർജിയുടെ ആകെ ജീവനക്കാരിൽ 80 ശതമാനത്തോളം പേരും ഓസ്‌ട്രേലിയയിൽ, പ്രത്യേകിച്ച് പശ്ചിമ ഓസ്‌ട്രേലിയ കേന്ദ്രീകരിച്ചാണ് പ്രവർത്തിക്കുന്നത്. എങ്കിലും, നിർദിഷ്ട പിരിച്ചുവിടലിൽ എത്ര തദ്ദേശീയ ജീവനക്കാർക്ക് തൊഴിൽ നഷ്ടപ്പെടുമെന്ന കാര്യത്തിൽ കമ്പനി ഇതുവരെ കൃത്യമായ കണക്കുകൾ പുറത്തുവിട്ടിട്ടില്ല.
പ്രഖ്യാപനം പുറത്തുവന്നതിന് പിന്നാലെ പ്രതികരണവുമായി പശ്ചിമ ഓസ്‌ട്രേലിയൻ ട്രഷറർ റീറ്റ സഫിയോട്ടി രംഗത്തെത്തി. വൻതോതിലുള്ള തൊഴിൽ നഷ്ടം അങ്ങേയറ്റം നിരാശാജനകമാണെന്ന് അവർ പറഞ്ഞു. എങ്കിലും സംസ്ഥാനത്തിന്റെ സാമ്പത്തിക അടിത്തറയിൽ നിർണായക പങ്കുവഹിക്കുന്ന പ്രകൃതിവാതക മേഖലയ്ക്ക് സർക്കാരിന്റെ പൂർണ പിന്തുണ തുടർന്നും ഉണ്ടാകുമെന്ന് അവർ വ്യക്തമാക്കി. 2028-ഓടെ വലിയ തോതിലുള്ള സാമ്പത്തിക ബാധ്യതകൾ കുറയ്ക്കാനും നിക്ഷേപകരുടെ വരുമാനം വർധിപ്പിക്കാനും ലക്ഷ്യമിട്ടാണ് കമ്പനി പുതിയ പുനഃസംഘടനയിലേക്ക് കടന്നിരിക്കുന്നത്.
