വാഷിങ്ടൺ: അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് തിരിച്ചടി നേരിട്ടതിനു പിന്നാലെ പാർട്ടിയെ അനുകൂലിച്ച് സമൂഹമാധ്യമമായ എക്സിൽ (X) പങ്കുവച്ച പ്രചാരണ പോസ്റ്റുകൾ നീക്കം ചെയ്ത് ശതകോടീശ്വരൻ ഇലോൺ മസ്‌ക്. തിരഞ്ഞെടുപ്പിൽ റിപ്പബ്ലിക്കൻ സ്ഥാനാർഥികൾക്കായി ഏകദേശം 474 ദശലക്ഷം ഡോളർ (ഏകദേശം 4,700 കോടി രൂപ) ചെലവഴിച്ച ശേഷമാണ് മസ്‌കിന്റെ നടപടി.
ഒക്ടോബർ 29-ന് പങ്കുവച്ച റിപ്പബ്ലിക്കൻ സെനറ്റർമാരെ തിരഞ്ഞെടുക്കണമെന്ന് ആവശ്യപ്പെടുന്ന പോസ്റ്റും തിരഞ്ഞെടുപ്പ് ദിവസം വോട്ടർമാരോട് ‘Vote red today!’ എന്ന് ആഹ്വാനം ചെയ്ത പോസ്റ്റുമാണ് മസ്‌ക് നീക്കം ചെയ്തത്. നേരത്തേ തന്റെ പ്രൊഫൈലിൽ പിൻ ചെയ്തുവച്ചിരുന്ന ഒക്ടോബർ 29-ലെ പോസ്റ്റ് നവംബർ നാലിനാണ് നീക്കം ചെയ്തതെന്നാണ് റിപ്പോർട്ടുകൾ.
റിപ്പബ്ലിക്കൻ സ്ഥാനാർഥികൾക്കായി വൻതുക ചെലവഴിച്ചിട്ടും ഡെമോക്രാറ്റുകൾക്ക് കോൺഗ്രസിന്റെ ഇരു സഭകളിലും ഭൂരിപക്ഷം നേടാനായത് മസ്‌കിന് തിരിച്ചടിയായി. ടെക്സസിലെ സെനറ്റ് തിരഞ്ഞെടുപ്പിൽ റിപ്പബ്ലിക്കൻ സ്ഥാനാർഥി കെൻ പാക്സണെ പരാജയപ്പെടുത്തി ഡെമോക്രാറ്റ് ജെയിംസ് തലാരിക്കോ വിജയിച്ചിരുന്നു. പാക്സണിന്റെ പ്രചാരണത്തിന് മസ്‌ക് വലിയ സാമ്പത്തിക പിന്തുണ നൽകിയിരുന്നു.
മസ്‌കിന്റെ പോസ്റ്റുകൾ നീക്കം ചെയ്ത കാര്യം എക്സിലെ എഐ ചാറ്റ്ബോട്ടായ ഗ്രോക്കും സ്ഥിരീകരിച്ചു. തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് വലിയ തിരിച്ചടി നേരിട്ടതിനു പിന്നാലെയാണ് ‘Vote red today!’ എന്ന പോസ്റ്റ് നീക്കം ചെയ്തതെന്നായിരുന്നു ഗ്രോക്കിന്റെ പ്രതികരണം.
അതേസമയം, തിരഞ്ഞെടുപ്പ് ഫലത്തോട് പരിഹാസരൂപത്തിലാണ് മസ്‌ക് പ്രതികരിച്ചത്. ‘തിരഞ്ഞെടുപ്പിൽ ഇടപെടുന്ന എന്റെ ബഹിരാകാശ ലേസറുകൾ ഇത്തവണ പ്രവർത്തിച്ചില്ലെന്നു തോന്നുന്നു’ എന്നായിരുന്നു എക്സിലെ അദ്ദേഹത്തിന്റെ കുറിപ്പ്. ബഹിരാകാശത്ത് ഡാറ്റാ സെന്ററുകൾ സ്ഥാപിക്കുന്നതിനെക്കുറിച്ചും അദ്ദേഹം പ്രതികരിച്ചിരുന്നു.
എന്നാൽ, റിപ്പബ്ലിക്കൻ പാർട്ടിയെ അനുകൂലിച്ചുള്ള എല്ലാ പോസ്റ്റുകളും മസ്‌ക് നീക്കം ചെയ്തിട്ടില്ല. ചില പ്രചാരണ പോസ്റ്റുകൾ മാത്രമാണ് അപ്രത്യക്ഷമായതെന്നാണ് റിപ്പോർട്ടുകൾ. പോസ്റ്റുകൾ നീക്കം ചെയ്തതിന്റെ കാരണം മസ്‌ക് പരസ്യമായി വ്യക്തമാക്കിയിട്ടില്ല.
