ദിബ്രുഗഡ് (അസം): അസമിലെ ദിബ്രുഗഡ് ജില്ലയിൽ ഓയിൽ ഇന്ത്യ ലിമിറ്റഡിന്റെ (OIL) ഇന്റർമീഡിയറ്റ് ടാങ്ക് ഫാമിൽ അതിശക്തമായ സ്ഫോടനവും വൻ തീപിടിത്തവും. വെള്ളിയാഴ്ച തെംഗാഖട്ടിലെ അസംസ്‌കൃത എണ്ണ സംഭരണ കേന്ദ്രത്തിലുണ്ടായ അപകടത്തിൽ നിരവധി തൊഴിലാളികൾക്ക് ഗുരുതരമായി പരിക്കേൽക്കുകയും ഒരാളെ കാണാതാവുകയും ചെയ്തു.
ടാങ്ക് ഫാമിലെ ഒരു വാൽവ് പ്രവർത്തിപ്പിക്കുന്നതിനിടെയാണ് അപ്രതീക്ഷിതമായി സ്ഫോടനമുണ്ടായതെന്നാണ് പ്രാഥമിക നിഗമനം. സ്ഫോടനത്തിന്റെ പ്രകമ്പനത്തിലും തീപടർന്നതിലും പ്രദേശം മുഴുവൻ കനത്ത കറുത്ത പുകയാൽ മൂടി.
മുംബൈ ആസ്ഥാനമായുള്ള സ്പെക്‌ട്രോൺ എഞ്ചിനീയേഴ്സ് പ്രൈവറ്റ് ലിമിറ്റഡ് എന്ന കരാർ കമ്പനിയിലെ തൊഴിലാളികൾക്കാണ് അപകടത്തിൽ പരിക്കേറ്റത്. തപസ് ഗൊഗോയ്, ശൈലൻ ഗൊഗോയ്, കുമുദ് ഗൊഗോയ്, ഗോലാപ് ദത്ത, ഇന്ദ്ര ഗൊഗോയ് എന്നിവരുൾപ്പെടെ അഞ്ചോളം പേരെ ഗുരുതരാവസ്ഥയിൽ ദിബ്രുഗഡിലെ അസം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇവർ തീവ്രപരിചരണ വിഭാഗത്തിൽ ചികിത്സയിലാണ്. സ്ഫോടനത്തിന്റെ ആഘാതത്തിൽ ദൂരേക്ക് തെറിച്ചുവീണ മറ്റൊരു തൊഴിലാളിക്കായി പ്രദേശത്ത് ഊർജിതമായ തിരച്ചിൽ തുടരുകയാണ്.
തീ പൂർണ്ണമായും അണയ്ക്കുന്നതിനായി ഓയിൽ ഇന്ത്യയുടെയും അഗ്നിശമന സേനയുടെയും നിരവധി ഫയർ ടെൻഡറുകൾ സ്ഥലത്തെത്തി രക്ഷാപ്രവർത്തനം നടത്തിവരുന്നു. ഓയിൽ ഇന്ത്യയിലെ ഉന്നത ഉദ്യോഗസ്ഥരും ജില്ലാ പോലീസ് മേധാവിമാരും സ്ഥലത്തെത്തി സ്ഥിതിഗതികൾ നിരീക്ഷിക്കുകയാണ്. പ്ലാന്റിലും പരിസരത്തും സുരക്ഷ ശക്തമാക്കിയിട്ടുണ്ട്. സ്ഫോടനത്തിന്റെ യഥാർത്ഥ കാരണവും സംഭവിച്ച നാശനഷ്ടങ്ങളുടെ വ്യാപ്തിയും കണ്ടെത്താൻ ഉന്നതതല അന്വേഷണം ആരംഭിച്ചതായി അധികൃതർ വ്യക്തമാക്കി.
