വാഷിംഗ്ടൺ/തിരുവനന്തപുരം: ലോസ് ആഞ്ചലസ് മേയർ തിരഞ്ഞെടുപ്പിൽ ചരിത്രവിജയം കുറിച്ച് തിരുവനന്തപുരം സ്വദേശിനിയായ നിത്യ രാമൻ. നിലവിലെ മേയർ കാരൻ ബാസിനെ പരാജയപ്പെടുത്തിയാണ് ലോസ് ആഞ്ചലസിന്റെ മേയർ പദവിയിലെത്തുന്ന ആദ്യ ഏഷ്യൻ വംശജയെന്ന അഭിമാനകരമായ നേട്ടം നിത്യ രാമൻ സ്വന്തമാക്കിയത്. ന്യൂയോർക്കിൽ സോഹ്റാൻ മമദാനി അധികാരത്തിലേറിയതിന് പിന്നാലെ ലോസ് ആഞ്ചലസിലും ഇന്ത്യൻ വംശജ നഗരസാരഥ്യം ഏറ്റെടുത്തത് യു.എസ് രാഷ്ട്രീയത്തിൽ വലിയ തരംഗമാണ് സൃഷ്ടിച്ചിരിക്കുന്നത്. ഇതോടെ ഇന്ത്യൻ നഗരങ്ങളിലെ മേയർമാരും യു.എസ് നഗരങ്ങളിലെ മേയർമാരും തമ്മിലുള്ള അധികാര വ്യത്യാസങ്ങളെക്കുറിച്ചുള്ള ചർച്ചകളും രാജ്യാന്തരതലത്തിൽ സജീവമായിരിക്കുകയാണ്.
ലോസ് ആഞ്ചലസ് പോലുള്ള ഒരു വൻ നഗരത്തിന്റെ ബജറ്റ്, നഗരവികസനം, പൊലീസ് സംവിധാനം എന്നിവയുടെ സമ്പൂർണ്ണ ചുമതലയാണ് ഇനി നിത്യ രാമന്റെ കൈകളിലെത്തുന്നത്. ഇന്ത്യൻ ഭരണഘടനയുടെ 74-ാം ഭേദഗതി നഗരസഭകൾക്ക് സ്വയംഭരണാധികാരം വിഭാവനം ചെയ്യുന്നുണ്ടെങ്കിലും, പ്രായോഗികതലത്തിൽ ഇന്ത്യയിലെ മേയർമാർക്ക് വളരെ പരിമിതമായ അധികാരങ്ങൾ മാത്രമാണുള്ളത് എന്ന യാഥാർത്ഥ്യത്തിലേക്ക് കൂടിയാണ് നിത്യ രാമന്റെ വിജയം വിരൽചൂണ്ടുന്നത്.
