സിഡ്നി: മാനസികാസ്വാസ്ഥ്യം പ്രകടിപ്പിച്ച 48 വയസ്സുകാരിയായ സ്ത്രീയെ നഗ്നയാക്കി ക്രൂരമായി മർദ്ദിച്ച കേസിൽ ജയിൽ ശിക്ഷ അനുഭവിച്ചിരുന്ന രണ്ട് മുൻ പോലീസ് ഉദ്യോഗസ്ഥരുടെ തടവുശിക്ഷ ന്യൂ സൗത്ത് വെയിൽസ് കോടതി രണ്ടര വർഷം വീതം കുറച്ചു. നേഥൻ ബ്ലാക്ക് (30), തിമോത്തി ജോൺ ട്രോട്ട്ഷ് (31) എന്നീ മുൻ ഉദ്യോഗസ്ഥർക്കാണ് അപ്പീൽ കോടതിയിൽ നിന്ന് ഇളവ് ലഭിച്ചത്.
2023 ജനുവരിയിൽ സിഡ്നിയുടെ പടിഞ്ഞാറൻ മേഖലയിൽ വെച്ചായിരുന്നു കേസിനാസ്പദമായ സംഭവം. കടുത്ത മാനസിക വിഭ്രാന്തിയിലായിരുന്ന നഗ്നയായ സ്ത്രീയെ സഹായിക്കാനായി എത്തിയ ഉദ്യോഗസ്ഥർ ഇവരെ അതിക്രൂരമായി ചവിട്ടുകയും മർദ്ദിക്കുകയും മുറിവുകളിലും രഹസ്യഭാഗങ്ങളിലുമടക്കം പെപ്പർ സ്പ്രേ പ്രയോഗിക്കുകയും ചെയ്യുകയായിരുന്നു. സംഭവത്തെത്തുടർന്ന് സർവീസിൽ നിന്ന് പിരിച്ചുവിടപ്പെട്ട ഇരുവരെയും വിചാരണക്കോടതി അഞ്ച് വർഷത്തിലധികം തടവിന് ശിക്ഷിച്ചിരുന്നു.
ശിക്ഷ കഠിനമാണെന്നും വിചാരണക്കോടതി നിയമപരമായ മാനദണ്ഡങ്ങൾ നിശ്ചയിച്ചതിൽ പിഴവ് സംഭവിച്ചെന്നും ചൂണ്ടിക്കാട്ടിയാണ് പ്രതികൾ അപ്പീൽ നൽകിയത്. പ്രതികളുടെ ക്രൂരതയെ വിചാരണക്കോടതി ‘ഗ്രാറ്റുവിറ്റസ് ക്രൂവൽറ്റി’ എന്ന് വിശേഷിപ്പിച്ചതിലും അധികാര ദുർവിനിയോഗവും വിശ്വാസവഞ്ചനയും ഒരേസമയം കുറ്റകൃത്യത്തിന്റെ ഗൗരവം വർദ്ധിപ്പിക്കുന്ന ഘടകങ്ങളായി കൂട്ടിച്ചേർത്തതിലും നിയമപരമായ വ്യക്തതക്കുറവുണ്ടെന്ന് കോടതി നിരീക്ഷിച്ചു. തുടർന്നാണ് ശിക്ഷയിൽ കുറവ് വരുത്തിയത്.
എന്നാൽ, ഇരയോട് പ്രതികൾ കാണിച്ചത് ഞെട്ടിക്കുന്ന തരത്തിലുള്ള മനുഷ്യത്വരഹിതമായ പെരുമാറ്റമാണെന്ന് അപ്പീൽ കോടതി കർശനമായി പരാമർശിച്ചു. മാനസിക വിഭ്രാന്തിയിലായിരുന്ന സ്ത്രീയിൽ നിന്ന് തങ്ങൾക്ക് ജീവന് ഭീഷണിയുണ്ടായിരുന്നുവെന്ന പ്രതികളുടെ വാദം കോടതി പൂർണ്ണമായും തള്ളി. ജയിലിൽ ഇവർ നേരിടുന്ന ഭീഷണികളും പശ്ചാത്താപവും കണക്കിലെടുത്താണ് ശിക്ഷ കുറച്ചതെന്നും കോടതി വ്യക്തമാക്കി. വിധി പ്രകാരം തിമോത്തി ജോൺ ട്രോട്ട്ഷിന്റെ ശിക്ഷ മൂന്ന് വർഷമായി ചുരുക്കി; 2027 ഓഗസ്റ്റിൽ പരോളിന് അർഹത നേടുന്നതിന് മുൻപ് ഇയാൾ രണ്ട് വർഷം തടവിൽ കഴിയേണ്ടി വരും.
