ന്യൂഡൽഹി: പശ്ചിമേഷ്യൻ സംഘർഷത്തിന്റെ പശ്ചാത്തലത്തിൽ സൗദി അറേബ്യയിലേക്കുള്ള വിമാന സർവീസുകൾ ഇന്ത്യൻ വിമാനക്കമ്പനികൾ വീണ്ടും റദ്ദാക്കി. ഇൻഡിഗോ, എയർ ഇന്ത്യ, എയർ ഇന്ത്യ എക്സ്പ്രസ് എന്നിവയാണ് സർവീസുകൾ നിർത്തിവെച്ചത്. ഇൻഡിഗോയുടെ ജിദ്ദ, മദീന സർവീസുകൾ നവംബർ 21 വരെയും റിയാദ്, ദമാം സർവീസുകൾ നവംബർ 30 വരെയും ഉണ്ടായിരിക്കില്ല. എയർ ഇന്ത്യയും എയർ ഇന്ത്യ എക്സ്പ്രസും സമാനമായ രീതിയിൽ സർവീസുകൾ റദ്ദാക്കിയിട്ടുണ്ട്. യാത്രക്കാരുടെ സുരക്ഷയ്ക്കാണ് മുൻഗണനയെന്നും സ്ഥിതിഗതികൾ സംബന്ധിച്ച വിവരങ്ങൾ യാത്രക്കാർക്ക് കൃത്യസമയത്ത് നൽകുമെന്നും ഇൻഡിഗോ അറിയിച്ചു.
ഇന്ത്യൻ വിമാനക്കമ്പനികൾ സർവീസുകൾ നിർത്തിവെക്കുമ്പോഴും സൗദി വിമാനക്കമ്പനികൾ ജിദ്ദ, റിയാദ്, ദമാം റൂട്ടുകളിൽ സർവീസ് തുടരുന്നുണ്ട്. സൗദി എയർലൈൻസ് നവംബർ 16 മുതൽ കോഴിക്കോട്ടേക്ക് സർവീസ് ആരംഭിക്കുമെന്നും ഒമാൻ എയർ റിയാദിൽ നിന്നുള്ള സർവീസ് പുനരാരംഭിച്ചിട്ടുണ്ടെന്നും റിപ്പോർട്ടുകൾ സൂചിപ്പിക്കുന്നു.
വിമാന സർവീസുകൾ റദ്ദാക്കിയതോടെ പ്രവാസികളും ഉംറ തീർഥാടകരുമടക്കമുള്ള നിരവധി യാത്രക്കാർ വലിയ പ്രതിസന്ധിയിലായിരിക്കുകയാണ്. നിലവിൽ സർവീസ് നടത്തുന്ന വിദേശ വിമാനക്കമ്പനികൾ ടിക്കറ്റ് നിരക്ക് മൂന്നിരട്ടിയോളം വർധിപ്പിച്ചതും യാത്രക്കാർക്ക് കനത്ത തിരിച്ചടിയായി. നേരത്തെ 15,000 രൂപയായിരുന്ന ടിക്കറ്റുകൾക്ക് ഇപ്പോൾ 40,000 മുതൽ 50,000 രൂപ വരെയാണ് ഈടാക്കുന്നതെന്നാണ് റിപ്പോർട്ടുകൾ. ഇതോടെ അടിയന്തരമായി നാട്ടിലെത്തേണ്ടവരും സൗദിയിലേക്ക് മടങ്ങേണ്ടവരുമായ പ്രവാസികൾ വൻ തുക നൽകി ടിക്കറ്റ് ബുക്ക് ചെയ്യേണ്ട ഗതികേടിലാണ്.
