ഗ്രേറ്റ് ഓഷ്യൻ റോഡിന് സമീപം സ്കൂൾ ബസ് കത്തിയമർന്നു; ഡ്രൈവറുടെ സമയോചിത ഇടപെടലിൽ രക്ഷപ്പെട്ടത് ഡസൻ കണക്കിന് വിദ്യാർത്ഥികൾ

മെൽബൺ: ഓസ്‌ട്രേലിയയിലെ വിക്ടോറിയയിലുള്ള ഗ്രേറ്റ് ഓഷ്യൻ റോഡിന് സമീപം ക്യാമ്പ് കഴിഞ്ഞ് മടങ്ങുകയായിരുന്ന സ്കൂൾ ബസ് തീപിടിച്ച് പൂർണ്ണമായും കത്തിയമർന്നു. ബുധനാഴ്ച (നവംബർ 18) രാവിലെയുണ്ടായ അപകടത്തിൽ ഡ്രൈവറുടെ സമയോചിതമായ ഇടപെടലിനെ തുടർന്ന് ഡസൻ കണക്കിന് വിദ്യാർത്ഥികളും അധ്യാപകരും അത്ഭുതകരമായി രക്ഷപ്പെട്ടു.

പ്രിൻസ്‌ടൗണിലെ ഫോർഡ്‌സ് റോഡിലൂടെ 60 സീറ്റുകളുള്ള ബസ് സഞ്ചരിക്കുന്നതിനിടെ രാവിലെ 10.12-ഓടെയാണ് സംഭവം. വാഹനത്തിൽ നിന്ന് കരിഞ്ഞ മണം വരുന്നത് ശ്രദ്ധയിൽപ്പെട്ട ഡ്രൈവർ ഒട്ടും സമയം കളയാതെ ബസ് നിർത്തി ഉള്ളിലുണ്ടായിരുന്ന എല്ലാവരെയും സുരക്ഷിതമായി പുറത്തിറക്കുകയായിരുന്നു. നിമിഷങ്ങൾക്കകം തീ ബസ്സിലാകെ ആളിപ്പടരുകയും ആകാശത്തേക്ക് കറുത്ത പുകച്ചുരുളുകൾ ഉയരുകയും ചെയ്തു.

ബസ്സിൽ നിന്നുള്ള തീ സമീപത്തെ പുൽമേടുകളിലേക്ക് പടർന്നതോടെ പ്രദേശത്തെ കർഷകർ ഉടൻതന്നെ രക്ഷാപ്രവർത്തനത്തിനിറങ്ങി. തീ പടരുന്നത് തടയാൻ കർഷകർ ഫയർബ്രേക്കുകൾ നിർമ്മിക്കുകയും വാട്ടർ ടാങ്കറുകൾ ഉപയോഗിച്ച് തീയണയ്ക്കാൻ സഹായിക്കുകയും ചെയ്തു. തുടർന്ന് ആറ് സി.എഫ്.എ യൂണിറ്റുകൾ സ്ഥലത്തെത്തുകയും രാവിലെ 11.41-ഓടെ തീ പൂർണ്ണമായും നിയന്ത്രണവിധേയമാക്കുകയും ചെയ്തു.

സംഭവത്തിൽ ആർക്കും പരിക്കേറ്റിട്ടില്ലെന്ന് അധികൃതർ സ്ഥിരീകരിച്ചു. വൻ ദുരന്തം ഒഴിവാക്കാൻ സഹായിച്ച ബസ് ഡ്രൈവറുടെ വേഗത്തിലുള്ള ഇടപെടലിനെയും പ്രദേശവാസികളുടെ കൂട്ടായ രക്ഷാപ്രവർത്തനത്തെയും പോലീസ് പ്രത്യേകം അഭിനന്ദിച്ചു. തീപിടുത്തത്തിന്റെ കൃത്യമായ കാരണം കണ്ടെത്തുന്നതിനായി അന്വേഷണം തുടരുകയാണെന്നും സംഭവത്തിൽ അസ്വാഭാവികമായി ഒന്നുമില്ലെന്നും പോലീസ് വ്യക്തമാക്കി.

Leave a Reply

Your email address will not be published. Required fields are marked *