ന്യൂകാസിൽ: ആൾക്കൂട്ടത്തിലേക്ക് പാഞ്ഞുകയറിയ ബി.എം.ഡബ്ല്യു കാറിന് മുന്നിൽനിന്ന് രണ്ട് പിഞ്ചു പേരക്കുട്ടികളെ തള്ളിമാറ്റി സ്വയം അപകടം ഏറ്റുവാങ്ങിയ അറുപത്തേഴുകാരനായ മുത്തശ്ശൻ രക്ഷകനായി മാറി. ന്യൂകാസിൽ നൈറ്റ്സ് ടീമിന്റെ ആരാധകർക്കിടയിലേക്ക് കാർ ഇടിച്ചുകയറുന്നതിന് തൊട്ടുമുൻപാണ് ‘ദ ബാർബർ’ എന്നറിയപ്പെടുന്ന ഡേവ് മാർട്ടിൻ സ്വന്തം ജീവൻ പണയംവെച്ച് കുട്ടികളെ രക്ഷപ്പെടുത്തിയത്.
കുട്ടികളെ വശങ്ങളിലേക്ക് തള്ളിമാറ്റിയതിന് പിന്നാലെ വേഗത്തിലെത്തിയ കാർ ഡേവിന്റെ ശരീരത്തിലേക്ക് ഇടിച്ചുകയറുകയായിരുന്നു. അപകടത്തിൽ ഇരു കാലുകൾക്കും ഒന്നിലധികം ഒടിവുകൾ സംഭവിച്ച അദ്ദേഹത്തെ ഉടൻതന്നെ ജോൺ ഹണ്ടർ ആശുപത്രിയിൽ പ്രവേശിപ്പിച്ചു. എട്ട് മണിക്കൂറോളം നീണ്ട സങ്കീർണ്ണമായ ശസ്ത്രക്രിയയ്ക്കാണ് അദ്ദേഹം വിധേയനായത്.
വാൾസെൻഡിൽ നടന്ന ഈ ദാരുണമായ അപകടത്തിൽ കുട്ടികളടക്കം പത്തുപേർക്ക് പരിക്കേറ്റിട്ടുണ്ട്. ഇതിൽ ഗുരുതരമായി പരിക്കേറ്റ അഞ്ചുവയസ്സുകാരിയുടെ നില നിലവിൽ ഗുരുതരമാണെങ്കിലും അപകടനില തരണം ചെയ്തതായി ആശുപത്രി അധികൃതർ അറിയിച്ചു. സംഭവവുമായി ബന്ധപ്പെട്ട് 18-കാരനായ ഇൻഡിക സമരസിംഗെയ്ക്കെതിരെ പോലീസ് ഒൻപത് വകുപ്പുകൾ ചുമത്തി കേസെടുത്തു. ഏഴ് വർഷം വരെ തടവുശിക്ഷ ലഭിക്കാവുന്ന വകുപ്പുകൾ ഇതിലുണ്ട്. ഞായറാഴ്ച കോടതിയിൽ ഹാജരാക്കിയ പ്രതിക്ക് ജാമ്യം നിഷേധിച്ചു. വാഹനം ബോധപൂർവ്വം ആൾക്കൂട്ടത്തിലേക്ക് ഇടിച്ചുകയറ്റിയതല്ലെന്നാണ് പോലീസിന്റെ പ്രാഥമിക നിഗമനം. കുറ്റക്കാരനാണെന്ന് കണ്ടെത്തിയാൽ പ്രതിക്ക് പരമാവധി കടുത്ത ശിക്ഷ ഉറപ്പാക്കണമെന്ന ആവശ്യവും ശക്തമാകുന്നുണ്ട്.
