ഗംഗയ്ക്ക് കുറുകെ വികസനത്തിന്റെ ആറുവരിപ്പാലം; നിതീഷ് സേതു രാജ്യത്തിന് സമർപ്പിച്ച് പ്രധാനമന്ത്രി

വൈശാലി: ബീഹാറിലെ വൈശാലി ജില്ലയിൽ ഗംഗാ നദിക്ക് കുറുകെ നിർമ്മിച്ച ആറുവരി കേബിൾ-സ്റ്റേയ്ഡ് പാലമായ ‘നിതീഷ് സേതു’ പ്രധാനമന്ത്രി നരേന്ദ്ര മോദി രാജ്യത്തിന് സമർപ്പിച്ചു. മുൻ മുഖ്യമന്ത്രി നിതീഷ് കുമാറിന്റെ പേരിലുള്ള ഈ പാലം പട്നയിലെ കച്ചി ദർഗയെ വൈശാലി ജില്ലയിലെ ബിദുപൂരുമായി ബന്ധിപ്പിക്കുന്നു. പ്രധാന നദിക്ക് കുറുകെയുള്ള 9.76 കിലോമീറ്റർ ഭാഗവും അപ്രോച്ച് റോഡുകളും ഉൾപ്പെടെ ആകെ 19.76 കിലോമീറ്റർ നീളമുള്ള ഈ ബൃഹത് പദ്ധതി വടക്കൻ ബീഹാറിനെയും തെക്കൻ ബീഹാറിനെയും തമ്മിൽ ബന്ധിപ്പിക്കുന്ന സുപ്രധാന പാതയായി മാറും. ഉദ്ഘാടന ചടങ്ങിൽ ബീഹാർ ഗവർണർ ലെഫ്റ്റനന്റ് ജനറൽ സയ്യിദ് അത്താ ഹസ്‌നൈൻ, മുഖ്യമന്ത്രി സമ്രാട്ട് ചൗധരി, കേന്ദ്രമന്ത്രി ചിരാഗ് പാസ്വാൻ തുടങ്ങിയ പ്രമുഖർ പങ്കെടുത്തു.

ഏകദേശം 4,280 കോടിയിലധികം രൂപ ചെലവഴിച്ച് നിർമ്മിച്ച ഈ ആധുനിക എക്സ്ട്രാഡോസ്ഡ് കേബിൾ-സ്റ്റേയ്ഡ് പാലം പട്നയിലെ ഗാന്ധി സേതുവിലെ രൂക്ഷമായ ഗതാഗതക്കുരുക്കിന് വലിയ പരിഹാരമാകും. 2012-ൽ നിതീഷ് കുമാർ മുഖ്യമന്ത്രിയായിരുന്ന കാലത്താണ് ഈ പദ്ധതിക്ക് തുടക്കം കുറിച്ചതെങ്കിലും 2015-ലാണ് നിർമ്മാണ പ്രവർത്തനങ്ങൾ ഔദ്യോഗികമായി ആരംഭിച്ചത്. പുതിയ പാലം യാഥാർത്ഥ്യമായതോടെ രാഘോപൂർ പ്രദേശത്തെ ജനങ്ങൾക്ക് എല്ലാ കാലാവസ്ഥയിലും തടസ്സമില്ലാത്ത യാത്രാസൗകര്യം ലഭ്യമാകുന്നതിനൊപ്പം, പ്രദേശത്ത് വിനോദസഞ്ചാരത്തിനും ലോജിസ്റ്റിക്സ് മേഖലയ്ക്കും വലിയ നിക്ഷേപ സാധ്യതകൾ തുറക്കുമെന്നും അധികൃതർ വിലയിരുത്തുന്നു.

പാലത്തിന്റെ ഉദ്ഘാടനത്തോടൊപ്പം വൈശാലിയിൽ വെച്ച് ഏകദേശം 34,470 കോടി രൂപയുടെ വിവിധ വികസന പദ്ധതികളുടെ ഉദ്ഘാടനവും തറക്കല്ലിടലും പ്രധാനമന്ത്രി നിർവ്വഹിച്ചു. റോഡ്, ഊർജ്ജം, ആരോഗ്യം, വിദ്യാഭ്യാസം എന്നീ മേഖലകളിലെ പദ്ധതികൾക്ക് പുറമെ 100 പി.എം-ഇബസ്സുകൾ ഫ്ലാഗ് ഓഫ് ചെയ്യുകയും 26,900-ലധികം ഗുണഭോക്താക്കൾക്കുള്ള പ്രധാനമന്ത്രി ആവാസ് യോജന വീടുകളുടെ ഗൃഹപ്രവേശം നടത്തുകയും ചെയ്തു. അതേസമയം, പാലത്തിന് നിതീഷ് കുമാറിന്റെ പേര് നൽകിയതിനെതിരെ ആർ.ജെ.ഡി നേതാവ് തേജസ്വി യാദവ് വിമർശനവുമായി രംഗത്തെത്തിയതോടെ ഉദ്ഘാടനത്തിന് പിന്നാലെ സംസ്ഥാനത്ത് രാഷ്ട്രീയ വാക്പോരും ശക്തമായിട്ടുണ്ട്.

Leave a Reply

Your email address will not be published. Required fields are marked *