കൊൽക്കത്ത: ആധാർ കാർഡ്, പാൻ കാർഡ്, വോട്ടർ തിരിച്ചറിയൽ കാർഡ്, ബാങ്ക് പാസ്ബുക്ക്, പൂർവികരുടെ ഭൂമിയുടെ രേഖകൾ എന്നിവയൊന്നും ഇന്ത്യൻ പൗരത്വം തെളിയിക്കുന്ന നിർണായക രേഖകളല്ലെന്ന് കൊൽക്കത്ത ഹൈക്കോടതി നിരീക്ഷിച്ചു. ബംഗ്ലാദേശ് പൗരനാണെന്ന് സംശയിക്കുന്ന ഒരാളെ തടങ്കലിൽ പാർപ്പിച്ചതിനെ ചോദ്യം ചെയ്ത് സമർപ്പിച്ച ഹേബിയസ് കോർപസ് ഹർജി തള്ളിക്കൊണ്ടാണ് കോടതിയുടെ പരാമർശം.
മുർഷിദാബാദ് സ്വദേശിയെന്ന് അവകാശപ്പെട്ട നസീർ എന്നയാളെ അധികൃതർ വിദേശ പൗരനാണെന്ന സംശയത്തെ തുടർന്ന് തടങ്കൽ കേന്ദ്രത്തിലേക്ക് മാറ്റിയിരുന്നു. പ്രത്യേക വോട്ടർ പട്ടിക പുനഃപരിശോധനയ്ക്കിടെ (Special Intensive Revision) അദ്ദേഹത്തിന്റെ പേര് വോട്ടർ പട്ടികയിൽ നിന്ന് നീക്കിയതും കേസിൽ പരാമർശിക്കപ്പെട്ടു. ഈ നടപടിക്കെതിരെ ബന്ധു കോടതിയെ സമീപിച്ചെങ്കിലും സംസ്ഥാനത്തിന്റെ നടപടിയിൽ ഇടപെടാൻ ഹൈക്കോടതി വിസമ്മതിച്ചു.
ജസ്റ്റിസ് തപബ്രത ചക്രവർത്തിയുടെ ബെഞ്ച്, പൗരത്വം നിർണയിക്കേണ്ടത് ബന്ധപ്പെട്ട നിയമങ്ങളുടെ അടിസ്ഥാനത്തിലാണെന്നും ആധാർ, പാൻ, വോട്ടർ ഐഡി തുടങ്ങിയ രേഖകൾ തിരിച്ചറിയലിനും മറ്റ് ഭരണകാര്യങ്ങൾക്കുമുള്ളവയാണെങ്കിലും അവ മാത്രം ഇന്ത്യൻ പൗരത്വം സ്ഥാപിക്കാൻ മതിയാകില്ലെന്നും വ്യക്തമാക്കി. ഹർജിക്കാരൻ സമർപ്പിച്ച രേഖകളിൽ വൈരുധ്യങ്ങളുണ്ടെന്നും കോടതി ചൂണ്ടിക്കാട്ടി.
