ജറുസലെം: ഭാവിയിൽ അധികാരത്തിലെത്തുന്ന അമേരിക്കൻ പ്രസിഡന്റ് ഇസ്രയേലിനോട് ശത്രുതാപരമായ നിലപാട് സ്വീകരിച്ചേക്കാമെന്ന മുന്നറിയിപ്പുമായി ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ഇത്തരമൊരു സാഹചര്യം നേരിടാൻ ഇന്ത്യയുൾപ്പെടെയുള്ള രാജ്യങ്ങളുമായി പുതിയ സഖ്യങ്ങൾ രൂപീകരിക്കുകയും നിലവിലുള്ള ബന്ധങ്ങൾ ശക്തിപ്പെടുത്തുകയും വേണമെന്നും അദ്ദേഹം പറഞ്ഞു.
ഒക്ടോബർ 27ന് നടക്കാനിരിക്കുന്ന ഇസ്രയേൽ തെരഞ്ഞെടുപ്പിന് ഒൻപത് ദിവസം മാത്രം ശേഷിക്കെ, ഞായറാഴ്ച രാജ്യത്തിന്റെ പുതിയ സുരക്ഷാ നയം അവതരിപ്പിക്കുകയായിരുന്നു നെതന്യാഹു. അമേരിക്കൻ പ്രസിഡന്റ് ഡോണൾഡ് ട്രംപിന്റെ ഭരണകാലത്ത് ശേഷിക്കുന്ന രണ്ടുവർഷം പരമാവധി പ്രയോജനപ്പെടുത്തി വാഷിങ്ടണുമായുള്ള ബന്ധം ശക്തിപ്പെടുത്തുന്നതിനൊപ്പം ഭാവിയിലെ നയമാറ്റങ്ങൾക്കായി തയ്യാറെടുക്കണമെന്നും അദ്ദേഹം വ്യക്തമാക്കി.
“രണ്ടുവർഷത്തിനുശേഷം ഇസ്രയേലിനോട് കടുത്ത ശത്രുത പുലർത്തുന്ന ഒരു പ്രസിഡന്റിന് അമേരിക്കയിൽ അധികാരത്തിലെത്താൻ കഴിയും. അങ്ങനെയൊരു സാഹചര്യത്തെ എങ്ങനെ നേരിടും? അമേരിക്കയുമായുള്ള ബന്ധം എങ്ങനെ കൈകാര്യം ചെയ്യും?” എന്നായിരുന്നു നെതന്യാഹുവിന്റെ ചോദ്യം.
ഇന്ത്യയെ പ്രധാന പങ്കാളിയായി വിശേഷിപ്പിച്ച അദ്ദേഹം, ലാറ്റിനമേരിക്കയുൾപ്പെടെയുള്ള മേഖലകളിലെ രാജ്യങ്ങളുമായും ബന്ധം വികസിപ്പിക്കേണ്ടതിന്റെ ആവശ്യകത ചൂണ്ടിക്കാട്ടി. മാറുന്ന ആഗോള രാഷ്ട്രീയ സാഹചര്യത്തിൽ ഇസ്രയേലിന്റെ തന്ത്രപ്രധാനമായ താൽപര്യങ്ങൾ സംരക്ഷിക്കുകയാണ് ലക്ഷ്യം.
അതേസമയം, നെതന്യാഹു അവതരിപ്പിച്ച സുരക്ഷാ നയത്തെ പ്രതിപക്ഷ നേതാവ് ഗാദി ഐസൻകോട്ട് വിമർശിച്ചു. തെരഞ്ഞെടുപ്പിന് തൊട്ടുമുൻപ് അവതരിപ്പിച്ച ഈ നയം വ്യക്തമായ സുരക്ഷാ തന്ത്രമില്ലാത്ത രാഷ്ട്രീയ നീക്കമാണെന്നായിരുന്നു അദ്ദേഹത്തിന്റെ ആരോപണം.
