വാഷിങ്ടൺ: നീണ്ട 107 ദിവസത്തെ യുദ്ധപ്രതീതിക്കും കടുത്ത സംഘർഷങ്ങൾക്കും ഒടുവിൽ ലോകം സമാധാന പാതയിലേക്ക്. ലോകരാജ്യങ്ങൾ ഉറ്റുനോക്കിയിരുന്ന ഇറാൻ – അമേരിക്ക സമാധാന ധാരണ ഈ വരുന്ന വെള്ളിയാഴ്ച ഔദ്യോഗികമായി ഒപ്പുവെക്കുമെന്ന് ഉറപ്പായി. ധാരണ നിലവിൽ വന്ന കാര്യം ഇരുരാജ്യങ്ങളും ഔദ്യോഗികമായി സ്ഥിരീകരിച്ചിട്ടുണ്ട്. ഇതിന്റെ ഭാഗമായി ആഗോള വ്യാപാര മേഖലയിൽ നിർണ്ണായകമായ ഹോർമൂസ് കടലിടുക്ക് തുറക്കാനുള്ള നടപടികൾ ഇരുപക്ഷവും ഉടൻ തന്നെ ആരംഭിക്കും.
സമാധാന പ്രഖ്യാപനം പുറത്തുവന്നതോടെ ആഗോള സാമ്പത്തിക രംഗത്തും വലിയ മാറ്റങ്ങളാണ് ദൃശ്യമാകുന്നത്. ആഗോള വിപണിയിൽ എണ്ണ, സ്വർണം എന്നിവയുടെ വിലയിലും ഓഹരി വിപണികളിലും ഈ പ്രഖ്യാപനം വലിയ ചലനങ്ങൾ ഉണ്ടാക്കിക്കഴിഞ്ഞു. എന്നാൽ, ഇരുരാജ്യങ്ങളും തമ്മിലുള്ള ഈ ഒത്തുതീർപ്പ് നീക്കത്തിനെതിരെ ഇറാനിലും ഇസ്രയേലിലും ആഭ്യന്തരമായി ശക്തമായ എതിർപ്പുകളും പ്രതിഷേധ വികാരങ്ങളും നിലനിൽക്കുന്നുണ്ട്.
ആദ്യം ഒമാനും പിന്നീട് പാക്കിസ്ഥാനും മധ്യസ്ഥത വഹിച്ച് പലവട്ടം ചർച്ചകൾ നടത്തിയിട്ടും ഇരുരാജ്യങ്ങളും തമ്മിലുള്ള സംഘർഷം തുടർന്നുകൊണ്ടേയിരിക്കുകയായിരുന്നു. ഈ പ്രതിസന്ധി ഘട്ടത്തിലാണ് ഖത്തർ നിർണ്ണായകമായ പങ്കുമായി ചർച്ചകളിലേക്ക് ഇടപെടുന്നത്. കഴിഞ്ഞ ദിവസങ്ങളിൽ ഖത്തർ പ്രതിനിധി സംഘം ടെഹറാനിലേക്ക് രണ്ട് നിർണ്ണായക യാത്രകൾ നടത്തിയിരുന്നു. ഇതിൽ ഒരു യാത്ര, ഇറാനിൽ അമേരിക്കൻ സൈന്യം ശക്തമായ ആക്രമണം നടത്തിക്കൊണ്ടിരിക്കുന്ന സമയത്തായിരുന്നു എന്നതും ശ്രദ്ധേയമാണ്. ഈ തീവ്രശ്രമങ്ങളുടെ ഫലമായാണ് കഴിഞ്ഞ ദിവസം രാത്രി യു.എസ്. പ്രസിഡന്റ് ഡൊണാൾഡ് ട്രംപ് ധാരണ നിലവിൽ വന്നതായി പ്രഖ്യാപിച്ചത്. തൊട്ടുപിന്നാലെ ഇന്ന് ഇറാനും ഈ സമാധാനക്കരാർ സ്ഥിരീകരിക്കുകയായിരുന്നു.
