കാൻബറ: ഓസ്ട്രേലിയയിലെ സ്ഥിരതാമസക്കാരായ (Permanent Residents) വിദേശികൾക്ക് നൽകിവരുന്ന ക്ഷേമാനുകൂല്യങ്ങൾക്ക് നിയന്ത്രണം ഏർപ്പെടുത്തണമെന്ന പ്രതിപക്ഷ സഖ്യത്തിന്റെ (Coalition) പുതിയ നയപ്രഖ്യാപനത്തിനെതിരെ കടുത്ത വിമർശനവുമായി പ്രധാനമന്ത്രി ആന്റണി അൽബനീസ്. പ്രതിപക്ഷത്തിന്റെ ഈ നീക്കം സമൂഹത്തിൽ ഭിന്നതയുണ്ടാക്കുമെന്നും ദീർഘകാലമായി രാജ്യത്ത് കഴിയുന്ന സ്ഥിരതാമസക്കാരോട് കാണിക്കുന്ന അനീതിയാണെന്നും അൽബനീസ് കുറ്റപ്പെടുത്തി.
രാജ്യത്തിന് കോടിക്കണക്കിന് ഡോളർ ലാഭിക്കാനും ‘ഓസ്ട്രേലിയക്കാർക്ക് മുൻഗണന’ നൽകാനും ലക്ഷ്യമിട്ടാണ് ഈ പരിഷ്കരണമെന്ന് പ്രതിപക്ഷ നേതാവ് ആംഗസ് ടെയ്ലർ വ്യക്തമാക്കിയിരുന്നു. എന്നാൽ നിലവിൽ ആനുകൂല്യം ലഭിച്ചുകൊണ്ടിരിക്കുന്നവരെ പുതിയ നിയമത്തിൽ നിന്ന് ഒഴിവാക്കുമെന്നും (Grandfathered), മാനുഷിക പരിഗണനയിൽ എത്തിയ അഭയാർത്ഥികൾക്ക് നിയന്ത്രണം ബാധകമാകില്ലെന്നുമാണ് പ്രതിപക്ഷത്തിന്റെ വാദം.
എന്നാൽ, ഓസ്ട്രേലിയയുടെ സമ്പദ്വ്യവസ്ഥയിൽ വലിയ സംഭാവനകൾ നൽകുന്നവരാണ് സ്ഥിരതാമസക്കാരായ കുടിയേറ്റക്കാരെന്ന് പ്രധാനമന്ത്രി ഓർമ്മിപ്പിച്ചു. പ്രത്യേകിച്ച് വൃദ്ധജന പരിചരണം (Aged care), ആശുപത്രികൾ തുടങ്ങിയ നിർണായക മേഖലകളിൽ ഇവരുടെ സേവനം വിലമതിക്കാനാവാത്തതാണ്. ഇന്ത്യൻ, ചൈനീസ് പാരമ്പര്യമുള്ള വലിയൊരു വിഭാഗം കുടിയേറ്റ സമൂഹത്തെ ഈ നയം നേരിട്ട് ബാധിക്കുമെന്നും അദ്ദേഹം ചൂണ്ടിക്കാട്ടി.
വരാനിരിക്കുന്ന പൊതുതിരഞ്ഞെടുപ്പിൽ കുടിയേറ്റ സമൂഹങ്ങൾക്കിടയിൽ പാർട്ടിക്ക് വലിയ തിരിച്ചടിയുണ്ടാക്കാൻ ഈ നയം കാരണമാകുമെന്ന് പ്രതിപക്ഷ സഖ്യത്തിലെ ചില എംപിമാർ തന്നെ ആശങ്ക പ്രകടിപ്പിച്ചിട്ടുണ്ട്. പ്രതിപക്ഷം മുന്നോട്ടുവെച്ച ഒരു നയരൂപീകരണം മാത്രമാണിത് എന്നതിനാൽ നിലവിൽ ഓസ്ട്രേലിയൻ ഗവൺമെന്റിന്റെ ഔദ്യോഗിക നിയമമായി ഇത് മാറിയിട്ടില്ല.
